Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort vp den xxix.sten en dertichsten dach van Maerte]

Item voort vp den xxix.sten dach van Maerte, so waren binnen der stede vanden Sluys ghecommen mijn heere van Iselsteyn ende dye Marcgraue van Antwerpen, ende meer andere bi mijn here van Saintrein, ende vonden in haren Raet als dat sy twatere ter Sluys stakijtsen souden ende ketenen, twelck also ghedaen was den dertichsten dach van Maerte, omme datter gheene schepen passeren en souden van buyten noch van binnen. Ende achteruolghende den dertichsten dach van Maerte, so sonden dye van ghendt twee copyen, deene in walsche, ende dandere in Vlaemsche, daer of dat si den princepalen brief hadden ghenomen eenen Messagier vanden Roomschen Coninc, al daer in stont ghescreuen aen haren Capiteyn vander orloghe, aldus inhoudende. Siet wel toe aen die vergaderinghe van die van Ghendt, want si besich sijn om een generale paeys te maken hem hu lieden, maer wedersteket so datter niet of en commen, aenghesien dat ick ghearresteirt ben. Ende voort steict alomme tvier inne, ende hout secretelick huwen eedt. Ende pijnt te ghecrijghene een saufconduyt van thien daghen om dertich mannen. Ende binnen dier tijt soe comt binnen der stede van Brugghe, ende pijnt mi te ghecrijghene huyt der stede, want men my nyet seer sonderlinghe nauwe en bewaert, ende steket tvier dan al omme, ende vanckse alle ionghe ende oudt, ende doetse alle te nieuten. Vanden welcken men den Roomschen Coninck ghinc vraghen oft hy dese brieuen aldus ghescreuen hadde ende ghesonden, want daer en stont niements name inne vermont. Doen seyde die Roomsche Coninck ende swoer by sijnder edelheyt ende by sijnder doot dat hijt noeyt ghescreuen en hadde, noch ghedaen scrijuen, of ghepeinst en hadde sulcke brieuen te scrijuene, of yement te doen scrijuene, ofte te seyndene. Ende hi seyde oock tot hem lieden, eest datment aen my beuint ic wil mijn lijf verbueren, ende begheere dat men mi den hals of slae, ick salt hu lieden gheerne vergheuen. Doen seyden die van Ghendt die daer als doe binnen der stede van Brugghe waren, als dat die Coninc wilde doen vernemen naer den scrijuer van desen, ende wilden datmen ter hallen huyt

[fol. CC.xlij.r]

een ghebodt doen soude, ende gheuent den ghemeente te kennene alsoot gheschiede. Maer daer naer soe vergaderden Hooftmannen ende Dekenen met die van ghendt, seggende dat si in alder manieren begheerden te siene den principalen brief ende sijn hanteeken daervp, also si seyden dat den brief in hilt, omme alsoo si seyden dat den brief in hilt, omme al welcken brief dye van Ghendt sonden subijt te Ghendt. Ende vp den.xxx.sten dach van Maerte, inden voorauent so ghinghen die ghedeputeirde vanden drie leden slandts, metsgaders die ix.sware Dekens van Brugghe byden coninck, omme hem te tooghene die warachtigheyt vanden seluen brieue, want hijse selue gheteekent hadde met sijnder handt. Twelck hi daer al doe kende dattet also was, ende van meer ander brieuen. Ende sonderlinghe wist men wel dat hy eenen brief ghesonden hadde eer hi vp Cranenburch ghebrocht was, als dat alle dye garnisoenen nyet doen en souden noch houden en souden van alle dye brieuen die hy seynden soude, want hijt al bi bedwange soude moeten doen, als van sijnen sone te bringhene of te seyndene, ofte om hem lieden te doen lichtene huyt eeneghe steden, maer dat sijt altijd vroom ende sterck souden houden yeghens alle manne wie dattet ware. Ende dien seluen dach was ghesonden eenen brief vanden capiteyn van Gendt, die welcke lach Teeclo omme te weerene die van Hulst, die welcke meenden te commene roouen tot voor Brugghe of in tbrugsche quaertier, ende hi ontboot die van Brugghe of hem lieden yet gheliefde, hy was voor hem lieden bereet, waer of dat hy seere bedanckt was. Ende men screef hem lieden weder duere dat si ons van Brugghe altijt souden laten weten waer dat si laghen, omme hem lieden altijt bystant te doene, in dien dat noot ware, want wi van Brugghe daer toe bereet waren altijt alst hem lieden gheliefde. Voort so quammer vp den seluen dach eenen brief vander Sluys, ghesonden van mijn here van Santrain, hoe dat hy ons seere dede groeten, ende dat wi altijt wilden wel doen ende ons seluen helpen, want hi ons niet ghehelpen en conste, aenghesien dat het vyer te seere ghesprooct was, ende te varre ghecommen, maer soude altoos sijn huyterste beste doen van dat hi soude connen ende moghen, aenghesien onsen goede wille ende rechtueerdichede dye wi sochten, ende als noch soucken.