Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Vriendelike groetenesse aen den Hertoghe Phelips onsen natuerlicken here ende Prinche]

Vriendelike groetenesse aen den Hertoghe Phelips onsen natuerlicken here ende Prinche, ende aen alle den heeren Burchmeesters, Schepenen ende Raet, ende aen allen inghesetene sijnder stede van Mechelen. Voort hoe dat sy vry ende wel gherust mochten wesen, als dat den Roomschen Coninc niet messchien en soude binnen onser stede van Brugghe. Ende in dyen yement ter contrarie soude willen voortstellen, wie of van wat nacien dat hi ware, souden dat keeren ende beletten met onsen bloede, ende lieuer ons leuen daer voren laten, want hy vader es van onsen gheduchten ende natuerlicken heere ende Prinche den edelen Hertoghe Phelips, daer voren dat wi hem houden, ende wes wy doen dat en doen wi niet om ons singulier profijt, maer wi souden gheerne sien den orboor ende profijt van onsen erfachteghen heere ende Prinche den edelen Hertoghe Phelips, ende van sijnen lande ende goeden steden, dat kenne god die bi hem ende by hu lieden blijuen in siele ende in lijue.