Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xxviii.sten dach van Maerte]

Item vp den.xxviii.sten dach van Maerte, so quam binnen der stede van Brugghe een Messagier vander stede van Mechelen, dye welcke brochte eenen brief, als dat si hadden verstaen dat die van Ghendt ghecommunikiert waren metten Fransoysen, ende dat si ghesloten hadden te leuerene den Roomschen coninc inden handen vanden Coninck van Vranckerijcke leuende of doot. Ende die van Mechelen baden den lieden van Brugghe seere vriendelick dat si goede wake wilden houden ende scherp toe sien om den Roomschen Coninck wel te bewarene, want den edelen Hertoghe Phelips ende sijnen staet hadden wel vernomen dat den Roomsche coninck sijnen vadere wel ende eerlick was ghelogiert, maer badt ende dede bidden datmen sijnen vadere soude willen laten gaen achter straten alsoot wel behoorde,

[fol. CC.xli.v]

midts goeder bewaernesse daer of nemende, want hi wel verstaen heift, ende wi mede dat si hem niet ghearresteirt en hebben dan teender goeder waer omme, ende dat omme dat si saghen dat die landen ende steden van onsen gheduchten ende natuerlicken heere den edelen Hertoghe Phelips alle bijstier ende tachter wierden byden quaden ende valschen Rade die die Roomsche Coninck sijne vadere gheloofde, ende by hem hadde, ende langhe ghehadt hadde van eeneghe quaetwillende, also wel van binnen den lande als van buyten, maer baden die van Mechelen noch als voren dat wy wel toe sien wilden, want sy hoepten dat noch al goed worden soude byder gracien gods, ende baden omme corte antwoorde vp die voornomde sticken, twelcke ghedaen was in deser manieren hier naer volghende.