Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Item vp den.xxvi.sten dach van Maerte, so ordonneirde het commuyn van Brugghe duysent mannen dye welcke souden huyt trecken in onse Casselrye.

Te wetene tot den ghenen die by ons nyet ter marckt ghecommen en waren, omme hem lieden te vraghene wat wy aen hem lieden hadden, ende oock omme te vernieuwen haerlieder wetten huyter name vanden edelen Hertoghe Phelips onsen natuerlicken heere ende Prinche. Ende dye van Brugghe vernamen als dat die selue Casselrye eeneghe ghedeputeirde ghesonden hadden te Ghendt aen den Raet, omme aldaer mede te sluytene al dieser ghedaen soude worden, huyte ghedaen Duynkercke ende Greuelijnghe. Mae si lieten wel weten dat sy vroom ghenouch waren omme datte te houdene, ende dat si nyement in laten en souden binnen harer steden, noch vrient noch viant voor dat si andere antwoorde hadden vander vergaderinghe vander stede van Ghendt, maer wilden leuen ende steruen met onsen gheduchte here ende Prinche den edelen Hertoghe Phelips. Aldus so wast dat dese duysent mannen diere gheordonneirt waren nieuwers en ghinghen, maer bleuen thuys. Ende vp den seluen.xxvi.sten dach van Maerte, was binnen der stede van Brugghe ter hallen huyt gheroupen, soe wie dat mijn here van Meerwede ghecrijghen conste, omme dat dye voorseyde here viel partye vanden lande, soude daer voren hebben

[fol. CC.xl.v]

hondert ponden groten, in dien hi hem leuerde, het ware leuende of doot. Ende inder ghelijcke Phelips van hondekin ooc vp hondert ponden grooten, so wie hem leuerde in handen weder leuende of doot.