[Item vp den.xxvij.sten dach van Maerte des nachts]
Item vp den.xxvij.sten dach van Maerte des nachts, so quam eenen roup vp die marct, als dat mijn here van Iselsteyn ende dye Marcgraue van Antwerpen ghecommen waren ter Sluys ende wilden commen ten Damme, ende tsegghen was dat sy vp quamen ten Azegate. Ende daer omme vergaderde tcommuyn al vp die marckt, omme eenich volck te seyndene om den Damme te sercouersene, ende grote engienen warer toe bereet ghemaeckt, maer daer waren eerst huyt Brugge ghesonden diueersche acouters om daer of dye waerheyt te vernemene, wanter tvolc in Brugghe seere mede beroert was. Maer die voorseyde acouters wederkeerdende, beuonden dattet al lueghene was. Maer men sandt ten Damme noch.xl.ghesellen, om dat si te bet bewaert souden sijn, maer men seyde te Brugghe datter eeneghe waren binnen der stede die dat voort ghestelt hadden, omme dieswille dat die duysent mannen diere gheordonneirt waren, nieuwers gaen en souden, alsoo si ooc en deden, maer bleuen gheordonneirt tot der tijt dat die dachuaert van Ghendt ghescheeden soude wesen, omme dan als voren al tselue te doene.
Auteursrechtvrij