Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort vp den xxiij.sten dach van Maerte]

Item voort vp den xxiij.sten dach van Maerte, so hadden vernomen die heeren van Ghendt, soe deden oock onse ghedeputeirde vander stede van Brugghe, hoe dat mijn here van Iselsteyn ende die Graue van Soorne quamen van Antwerpen met vier duysent mannen ,te wetene drie hondert peerden, ende die reste waren alle voetknechten, die welcke peerden men seyde dat sy alle trocken te Hulst waert, ende dat die voetknechten quamen ten Damme waert, ende waren gheordonneirt omme den Damme ende Middelburch in te nemene. Ende dat ghedaen sijnde, wilden ende meenden welden Coninck met foortsen ende met crachte van Brugghe te ghecrijghene. Daer omme dat die van Ghendt ende onse ghedeputeirde screuen aen ons, ende baden dat wi scherp toe sien souden int bewaren vanden Roomschen Coninck, want daer souden corts commen so si vernomen hadden drie duysent Ruyters ter sluys, dye welcke voorseyde Ruyters quamen om ons te verderuen ende te cranckene, in dyen si consten of mochten in eenegher wijs.