[Item voor noch vp den.xxij.sten dach van Maerte]
Item voor noch vp den.xxij.sten dach van Maerte, so waren alle die pingioenen vander marct ghedreghen inden burch, ende daer versochten si te hebbene eer si huyter burch gaen souden hare beseghelthede, ende was dese. Te wetene vander absolucie, van dat sy ter marct ghecommen waren, ende van al dies daer gheschiet soude wesen moghen, ende vander wapeninghe diemen alle iare houden soude als voorseyde es, ontrent sint Gillis dach, omme als dan ghecorrigiert te wordene alle dye ghene dye der stede te cort ghedaen hadden, ofte hem lieden ghemessuseirt in den eedt, ofte regement vander seluer stede. Ende doe was hem lieden gheantwoort datmen besich was met eenen sticke, dat si aen dye vander wet begheert hadden, ende dat was dat si baden datmen een ghebot ter hallen huyt doen soude, als dat nyement en soude wercken noch doen wercken, vp die verbuerte van.iij.ponden paresysen, ende diet wroughen soude die soude hebben tderde vander boete. Ende seyden oock als doe, als dat si den voorseyde ouden Schouteeten wilden gheiusticiert hebben. Doen ghinghen si weder ter marct, ende terstont ghincmen een ghebodt doen als voorseyde es. Ende des nachts te voren so was eenen brief gheuonden vp tschauot onder den pijnbanck, die als doe ooc ter hallen huyt ghelesen was, ende daer inne stont dit naeruolghende groetenesse aen dye wet vander stede van Brugghe, ende aen den ghemeenen buyck van diere, hoe dat si hem wel wachten souden, want si seere ghedreecht waren. Ende hoe dat hem desen gheuanghen voorseyde seere gheueynst hadden ghehouden, ende dat dede eenen Raet vander stede van Brugghe doe ter tijt sijnde, dye welcke den voorseyde gheuanghene al gheinformeirt hadde, van dies al dandere dye voor hem onthooft ende ghestoruen waren, verkent ende verleden hadden vp hem, metsgaders dat die selue al die tijt die hi absent gheweist hadde, was binnen den huyse vanden seluen man vanden Rade, aldus so moeste die selue wel wat weten vanden secrete vanden voorseyde gheuanghene. Ende den Dekene vanden temmerlieden, ende den Deken vanden wullen weuers, den Deken vanden scheerers, den Deken vanden smeden, ende vanden scheppers, waert datmense al ondersochte, sy souden wel wat vanden secrete van desen
Auteursrechtvrij