[Item vp den.xxij.sten dach van Maerte]
Item vp den.xxij.sten dach van Maerte, so begheerden dye van Ghendt aen dye Wet ende aen tghemeene van Brugge, omme te hebbene een verbant, als vander bewaernesse vanden coninck, omme twelcke het commuyn van Brugge seer gram was, ende si begheerden dat si den seluen brief seghelen souden, twelcke si gheen van al doen en wilden, ten ware dat alle die garnisoenen ghelicht waren huyt alle die smalle steden, wanter so een verbant was tusschen den.iij.leden ende den ghemeenen volcke vander stede van Brugghe. Ende voor begheerden die van Ghendt haren brief van verbande weder te hebbene, die si die van Brugghe ghegheuen hadden, als aengaende die duytsche heeren die te Ghendt gheuanghen laghen, die welcke si die van Brugghe belooft hadden weder te doen hebbene als si wilden ende dat begheeren souden. Voort sprac haerlieder verbant dat si aen die voorseyde gheuanghene heeren niet toutchieren noch commen en souden, vp groot verbant ende belofte dat si der stede ter cause van dyen ghedaen hadden. Ende om der groter belofte ende verbants wille dye si der stede van Brugghe ghedaen hadden, so begheerden sy verbant vande stede van Brugghe vander bewaernesse vanden Roomschen coninck, daer si lettel of niet toe te segghen en hadden, want ten was haerlieder entreprijse niet, noch si en hadden ons den coninck niet gheleuert, noch ooc te bewarene ghegheuen, want dat in haerlieder macht niet en was.
Auteursrechtvrij