Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xx.sten dach van Maerte]

Item vp den.xx.sten dach van Maerte, so quam van Ghendt huyten Rade binnen der stede van Brugghe mijn heere vanden Gruythuyse ende die here Ian vander fonteyne, ende ghinghen terstont byden coninck vanden Romeynen, als ghedeputeirt van mer Phelips van Rauesteyns weghe, al daer mijn heere vanden Gruythuyse last nam om te sprekene vanden paeyse in Brabant. Ende si quamen ront omme dye marct ende baden tcommuyn datmen die bagaedgie van mer Phelips van Rauesteyn die hier in die stede was soude willen seynden, twelcke sy doe niet en wilden consenteren, maer seyden dat hy daer selue commen soude. Om twelcke mijn heere vanden Gruythuyse gram wech track te Ghendt waert metten laste vanden coninck.

[Den.xxij.sten dach van Maerte]

¶ Voort vp den.xxij.sten dach van Maerte, so sandt mer Ioos de Baenst Ghijs de Baenst sone, dye Capiteyn ghestelt was vander stede vander Sluys ende van beede die casteelen eenen brief aen die van Brugge, hoe dat hy verstaen hadde dat hem dese gheuanghen die Schouteeten gheweist hadde hem bedreghen soude hebben, ende ooc den bastaert de Baenst, van welcken bedraghene hi ouer screef, dat die voorseyde gheuanghene quade cause hadde en heift, ende en was nyet wel bedocht, want wy van dien niet en sijn noeyt en waren, noch oock nemmermeer worden en sullen, maer wy weten wel dat bi quade toebringhers ende oorstekers of quade valsche informacie der wet toe ghebrocht sal sijn, daer wy

[fol. CC.xxxix.v]

niet vele omme en gheuen noch vp en passen, maer stellen dit in onse deere. Ende in desen seluen brief was noch eenen brief ghesloten, commende aen desen voorseyde gheuanghene, ghenouch luydende als den anderen, als dat hi hem wel bedincken soude eer hi storue, want hi wel wiste dat wi van gheenen saken en wisten, den lande of der stede aengaende.