Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[¶ Item vp den seluen dach als bouen]

¶ Item vp den seluen dach als bouen, so sonden die ghedeputeirde van diueersche plaetsen die daer vergadert waren, ooc eenen brief vriendelick Saluyt aen die van Brugghe, als dat si altijt bereet waren tonsen dienste, ende om dye weluaert vander stede van Brugghe, ende dat sy hoepten dat alle saken, als vanden paeyse ende ander discoorden al wel commen soude, maer baden seere datmen den voorseyde gheuanghene wel examineren wilde, ende datmen hem niet verhaesten en soude, maer hem vp houden tot dat si te Brugghe commen souden. Dyt baden vele diueersche ghedeputeirde, te wetene Hollant, Zeelant, Lutcenburch ende Vrieslant, want si alle wilden vallen ouer hem, ende sonderlinghe die van Hollant ende Zeelant, als dat sijn voortstel was, ende dat hi maecte metten coninc dat den meyskins ne gheene leenen en mochten versteruen, sonder alleene huyt ghesteken dat mijn here van Beuere toe behoorde ofte aenghinc, maer voort van alle dandere te legghene tsconincx tafele, te sijnen wille ende orbore ende profijte vanden Roomschen coninc voorseyde, also hi daer kende.etc.

[Den.xvij.sten dach van Maerte]

¶ Item vp den.xvij.sten dach van Maerte, so was gherecht ende gheiusticiert eene dye tanderen tijden Burchmeestere gheweist hadde. Ende was sijn verlijt dese naeruolghende pointen, als dat hi Burchmeester wesende vander stede van Brugghe, voort stelder ende vpstelder gheweist hadde sonder consent vanden coninc of van sijnen Prinche, te stellene den poorters van Brugghe ende te doen gheuene maentghelt, het welcke dat was contrarie sijnen eedt. Ende ten anderen dat hy hadde gheweist te Ghendt, daer die Graue Phelips was ende hem daer eedt doende, ende dat hy daer naer veruiel, doende contrarie sijnen eedt, ende dede den co-

[fol. CC.xxxvij.v]

ninck vanden Romeynen eedt. Ende kende als dat hi vpsetter was als vanden coninck vanden Romeynen te maken voocht ende momboor van alle den landen vanden graue phelips. Ende kende noch in sijn verlijt sonder pijne of banden, dat hi was vpsettere van een ceuencie van penninghen tot eender wapeninghe, sonder consent van sijnen here van Vlaendren, ofte eeneghe andere landen toebehorende den hertoghe Phelips, het welcke ooc was contrarie sijnen eedt. Verleedt noch hoe dat hy huyt gheweist hadde om eeneghe steden van sijnen natuerlicken here in te nemene, daer of dat groot erruer ende grief quam, het welcke ooc was contrarie sijnen eedt. Ende hoe dat hi vp den vrydach, den eersten dach van Sporcle ter burch quam, al daer den Roomschen coninc was, om hem aldaer bystant te doene met alle sijne knechten wel voorsien ende ghewapent, omme tcommuyn te helpene dwijnghene ende castijdene bi foortsen ende bi crachte, by al welck verlijden was vanden drie leden slandts daer ghecondempneirt te sijne ende onthooft metten sweerde, alsoot hem terstont ghebuerde, maer hy badt tcommuyn seere om gracie, maer ten mochte hem nyet ghebueren. Ende eer hi onthooft was so was vp tschauot ghespreet een root laken, daer vp dat hy knielde, ende dat om dat hy een Rudder was ende een seer edel man. Ende onthooft wesende, was terstont gheleyt in een kiste ende ghedreghen in Cranenburch, ende daer lietmene tot sauents ontrent den.vij.hueren, doen was hi ghehaelt vanden Carmers met.xxiiij.toortsen, ende als ghedreghen ten Carmers, ende daer stont tlijc al dyen nacht inden choor. Ende des anderdaechs was hi met groter solempniteyt ghedreghen tot sijnder heerlicheyt waert, maer alle die in den Rauwe ghinghen mesten binnen der stede blijuen, om datmen meende datter hem yement also soude gheabsenteirt hebben van den ghenen diemen noch sochte om te vanghene, ende daer nae som noch gheuanghen waren. Ende die van sijnder heerlichede haelden tlijc van hueren here met processyen, ende was daer eerlicken begrauen, want hi ghenouch een vanden edelsten van Vlaendren was.

[Den.xv.sten en den xviij.sten dach van Maerte en den eersten dach van Sporcle]

¶ Item noch vp den.xv.sten dach van Maerte, so verkende dese voorseyde Scouteeten gheweist hadde, dat die keyser Frederic vader vanden Roomschen coninck ghehadt hadde vanden lande dat wel bedrouch, twelck vp tghemeene landt ghestelt was totter somme van.lxxx^m.croonen, sonder alle andere costen, diemen noch om sijnen wille dede.

¶ Item vp den.xviij.sten dach in Maerte verkende noch dat die coninc ende hi al voren met een groot ghedeel van adherenten, quamen mede inden burch, ende die vppermeester vander orloghe ende vanden volcke van wapenen Petijt salasaert, ende noch meer medepleghers ende welwillende vanden coninc ende van hem lieden. Voort hoe alle dese waren in wille ende meenden vp den voorseyde vrydach den eersten dach van Sporcle, hadden si tijt ghehadt het commuyn van Brugge doot te slane eer dat si ter marct ghecommen souden hebben. Ende dyt bleef achtere omme dieswille dat tvolc vanden Ambochten ende neeringhen so vullic vergadert was ende bi een, ende waren beroert omme dat die Heynewiers die commen waren ontrent der stede so openbaer hem alree vertoochden als vianden der stede, want si waren ghecommen om die quaetwillende van binnen by te stane ende onse stede te helpene beroouen ende te pilgieren, dat was tvoortstel vanden quaetwillende hadt ghecommen naer haerlieder meenen. Eerst soudemen vier ghesteken hebben binnen Brugge, ende dan tvolc sijnde ten brande souden si in ghenomen hebben die marct, ende daer souden si bi hem lieden ontboden hebben alle die notabele, ende die bi hem lieden ghehouden hebben als geuanghen ende soudense ghestelt hebben vp groote sommen van penninghen, ende dan met dien penninghen gheuoert hebben die orloghe yeghens die van ghendt, ende souden tghemeene volck hebben ghesonden ten brande, ende tvpstel was al tvolc dat ten brande ghecommen soude hebben datmen die doot slaen soude, ende also het ghemeene tondere te houdene, ende haerlieder wille te vulbringhene.

¶ Item voor verkende hi noch hoe dat hi hadde horen seggen den coninc vanden Romeynen, ende den here van Polem, ende Maertin de swarte, ende mijn here van Montengy, ende mijn here van Nassauwe, ende mer Iacob dye heere, dat hem lieden leet was ende seer berauwen dat

[fol. CC.xxxviij.r]

si die stede van Ghendt, als sijse te haerlieder wille hadden niet en raseirden ende te nyeuten en deden met brande ende andersins. Dit verkende hi vp den.xviij.sten dach van Maerte.

¶ Item noch so verkende hi vp den seluen.xviij.sten dach van Maerte, hoe dat hi ghecommunikiert hadde metten Dekene vanden wullen weuers ende metten Deken vanden temmerlieden, hoe dat si vaste vernemen souden wie die meeste crijsschers waren in haerlieder ambochten, ende dat si hem die ouergheuen souden in ghescrifte bi namen ende bi toenemen, hi soude daer ouer sulcke correctie doen, dats hem een andere wachten soude bi iusticien, also hi wel begonste aen eenen temmerman, die hi dede onthoofden omme een seer cleen sake, ende eenen vuldere diemen hiet den schonen Maertin, die hi ooc dede onthoofden bi touer gheuen vanden Deken, also die voorseyde die selue Dekens in die sticken bedrouch, want si also ouer een ghedreghen hadden, ende dat sy altijt goet vrient ende ghetrauwe blijuen souden den voorseyde Scouteeten. Voort sonden die ghedeputeirde van Brugghe die te Ghendt laghen eenen brief vp den seluen dach, hoe dat mijn here van Rauesteyn ende phelips van Rauesteyn sijn sone, ende meer andere heren begheerden eene dachuaert te legghen te Bruessele, twelcke als dien dach noch niet gheconsenteirt en was, maer verhoorden aldaer ende vernamen wel als dat dye Marcgraue van Antwerpen, ende die stede van Mechelen, ende die stede van Hulst, ende ooc hoe dat die stede van Rijssele hem lieden ooc wilden moeyen ende hem lieden die wapeninghe aen trecken, ende hem lieden ghereet maecten met alle dye andere garnisoenen, omme den coninck te Brugge te commen haelene met foortsen ende met crachte Ende waren wel gheaduerteirt dat si daer toe grote engienen ghereet maecten ende grote macht van volcke, biddende der stede van Brugge, dat si neerstelic wilden toesien ende pijnen den.coninc.wel te bewarene, want het was daer omme al ghedaen. Ende haerlieder ghedeputeirde seyden te Ghendt dat si gheenen vullen last en hadden omme metten anderen den paeys te sluytene, ende het ghene dat daer gheordonneirt was met alle den anderen landen, metsgaders dat die voorseyde heren begeerden die dachuaert te verlegghen te Bruessele.