Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort vp den xvij.sten dach van Maerte]

Item voort vp den xvij.sten dach van Maerte, soe was van Ghendt ghesonden eenen brief, die welcke vp die marct int parc was ghelesen ouerluyt, binnen der tijt dat dese mesdadeghe daer present ende yeghenwoordich was. In welcken brief stont vriendelicke groetenesse aen Burchmeesters, Schepenen, Raet der stede van Brugghe, ende ooc aen den ghemeenen volcke der seluer stede, hoe dat te Ghendt ghecommen waren sekere ghedeputeirde van Vranckerijcke, die met hem lieden brochten dye beseghelthede aen Ghendt, Brugghe Ipre, ende aen alle andere steden die paeys begheerden vanden paeyse dye ghemaeckt was int Iaer van lxxxvij.dye te houdene in effecte vast ende ghestandich, ghelijc al die eerst gheconcludeirt ende ghesloten was. Voort so ontboden die van Ghendt, datmen den voorseyde gheuanghene nyet verhaesten en soude, want te Ghendt ghecommen waren vele lieden van diueerschen steden ende landen, clachtich vallende ouer den seluen gheuanghene, ghelijc als Hollant, Zeelandt, ende Lutcenburch, ende meer andere partyen, daer mede dat hi te doene ghehadt hadde binnen der tijt van sijnen regemente.