Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort so wasser gheordonneirt eenen brief]

[Den.xiiij.sten dach in Maerte]

Item voort so wasser gheordonneirt eenen brief, ende die ter hallen huyt ghelesen, inhoudende van hoe ende in wat manieren dat wy ter marckt ghecommen waren, ende hoe dat wy absolucie hebben souden vanden Baliu, Scouteetene, vanden Burchmeesters, Schepenen ende Raet, ende vander gheheelder wet Ende was te wetene om dat tlant qualick was gheregiert bi toe doene van sommeghe persoonen vanden lande, die den Roomschen coninck te vele gheloofs gaf, want hi te vele dede bi haerlieder Rade ende ingheuene, welcke dicwils was contrarie den profijte ende orbore vanden lande van Vlaen-

[fol. CC.xxxv.v]

dren ende van onsen gheduchten heere ende natuerlicken Prinche den hertoghe Phelips. Ende dit tghemeente siende ende ouermerckende hadden dat gheerne belet, ende omme dieswille quamen sy ter marckt met tenten ende met pauwelioenen ende met standaerden, omme van daer niet te scheedene voor ander stont, datmen die quaetwillende ende voortstelders van dien ghecorrigiert soude hebben, die welcke huyt waren omme tgarnisoen ende volc van wapenen in die stede te latene, omme tvolc cort ende tonder te houdene, ende huyt ende in te rijdene om orloghe te voerene yeghens dye van Ghendt, twelcke wy van Brugghe niet ghedooghen en wilden, want wi wel verstonden dattet so toe ghegaen soude hebben, ende hebben dit al belet omme te behoudene ons lijf wijf ende kijnderen in eeren ende voor onse naer commers. Twelcke dye Baliu, Schoutheetene, Burchmeesters, Schepenen ende raet beswoeren te houdene ende tonderhoudene yeghen alle die ghene die daer yeghen yet segghen of doen souden willen in eenegher manieren met lijve ende met goede. Ende dat selue beswoeren oock dye Dekenen ende hooftmannen vanden.vi.sestendeelen, ende oock alle die Dekens vanden cleenen neeringhen ende ambachten vander stede oock te helpene weerene alle quaetwillende vander voorseyde stede. Ende in teekene der warachticheyt so souden Baliu, Scouteeten, Burchmeesters, Schepenen, Raet, hooftmannen, ende alle die Dekenen voornomt haerlieder seghele hier aen doen steken, in teekene van meerder versekertheyt vander seluer ordonnancie. Dit was ghedaen den.xiiij.sten dach in Maerte.