Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den seluen xiiij.sten dach van Maerte]

Item vp den seluen xiiij.sten dach van Maerte, soe was noch eenen brief ter hallen huyt ghelesen, aengaende die.iij.leden slandts van Vlaendren,

als dat si deene den anderen verbonden, ende beloueden te onderhoudene alle dese naervolghende pointen. Ende es te wetene aenghesien dye goede cause die die van Brugghe ghehadt hebben omme ter marct te commene, ende den Roomschen coninck te houdene in bewaerder hant vp een eerlic huys, dat was vp Cranenburch omme beters wille, ende om meerdere grief ende quaet te belettene dat eeneghe quaetwillende voren hadden, in vercleeninghe vander voorseyde stede van Brugghe. Ende was voort gheordonneirt sommeghe duytsche heren te aresterene ende te legghene in bewaernessen van dye van gendt. Twelcke al was ghedaen omme datsi beletters waren vanden paeys te onderhoudene dye tusschen der croone van Vranckerijcke, ende die van Ghendt, ende den volcke vanden drie leden ghemaect was, ende ooc huyt waren omme onser stede cleenicheyt ende scoffiericheyt te doene, waer omme dat eenege gheiusticiert ende onthooft waren vp die marct vp een schavot by iugemente ende vonnesse vanden drie leden slandts van Vlaendren, so eest dat die drie leden slandts voorseyde agointelic vergheuen deen den anderen van al tghene dieser mach gheschiet sijn van vp die marct te commene metten pingioene te loopene, ende die huysen ende cloosters te besouckene, omme dye quatwilleghe te bet te vindene, ende belouen malcanderen haerlieder bystant daer in te doene yeghen eeneghe quaetwilleghe dye hem lieden ter causen van dies voorleden es, eeneghe molestacie souden willen doen. Welc verbant ende belofte wi vanden.iij.leden slandts van Vlaendren in oorconden der waerheyt agointelick, ende elc besondere hebben beseghelt met onsen seghelen, ende die daer aen ghehanghen. Dit was ghedaen vp den.xiiij.sten dach van Maerte. Anno.M.iiij^c.ende.lxxxvij.

¶ Item was noch gheboden ter hallen huyte vp den seluen dach, so wie dat den ouden Schouteeten ghehuyst of ghehoeft hadde, ende niet ter kennesse ghebrocht en hadde of bringhen en soude, wie dattet ware vrauwe of man, of priestere int cloostere, of in cluysen gheestelic of weerlic, men soude die hanghen voor sijn duere, ende haerlieder cloostre of woonste te nieten doen. Maer in dyen hem yement ter kennesse brochte, tghene dat hem die voorseyde belooft hadde, dat soudemen hem gheuen, ende noch libra ponden groten bouen dien, ende noch bouen dyen om noch bet te betalene

[fol. CC.xxxvi.r]

[soudemen] hem gheuen noch eene scroderye, of [L].libra groten daer voren. Ende dit was dye derde [reyse] dat dit ter hallen huyt gheroupen was

¶ Item voort was ter hallen huyt ghelesen ende gheboden, hoe dat alle die oude wethouders die gheuanghen waren, want mense niet beuinden en conste van cryeme, datmense huyt laten ende ontslaen soude, maer wat saken dat ceuijle aenghinc, daer vp souden die drie leden slants, metsgaders der wet, hooftmannen ende Dekens aduijs nemen, om daer of correctie te doene in tijden ende wijlen. Ende dit was ooc ghedaen vp den.xiiij.sten dach in Maerte.

¶ Item was noch voort ter hallen huytgheroupen, so wie dat verwonnen was van tsheren boete, die gaf den Scouteetene vry vranc ende seker gheleede vanden seluen.xiiij.sten dach in Maerte, tot Sinxen daer naer eerstcommende. Ende was ooc ten seluen daghe ghegheuen alle die bewettichde schuldenaers, vry gaende ende keerende den seluen tijt. Ende binnen deser tijt so souden die wethouders ordonneren den scamelen lieden sulcken redelicken termijn om betalen, so si goelicst mochten.

[Den.xx.sten dach van Maerte]

¶ Item vp den.xx.sten dach van Maerte ontrent den.vij.hueren inden auent, was die voorseyde die Scouteeten gheweist hadde, gheuonden int huys van Ian vanden keere een mutsereedere in die carmerstrate, ende hadde daer gheluuscht.v.weken lanc, ende was aldaer ghehaelt vanden Burchmeestere Ian de hamere, ende een van sijnen knapen, ende eenege temmerlieden, die welcke hem daer vonden sittende in een pilse, ende hy sandt om eenen keerle. Ende bi sijnder bede was hi al heymelic en stille gheleet tot vp den steen, sonder eenege roupinge of gheruchte te makene, dat hi gheuanghen was. Ende daer commende, was gheroupen ouerluyt, den ouden Scouteeten es ons gheuanghen man. Ende desen roup quam ter marct ooc ouerluyt, als dat hi gheuanghen was, waer omme dat al tvolc ouer al seere verblijt was, ende maecten grote ghenouchte van pijpene ende van trompene. Ende die kinderen riepen lancx der strate totten.x.hueren inden auent, die leuer etere es gheuanghen. Ende corts daer naer dat hi gheuangen was ende ter steene gheleet, soe was hi ghebrocht ter marct van Deken tot Dekene, omme datmen sien soude dat hi daer ware. Ende daer riepen si vp hem, ende daden hem vele schimps ende cleenicheyt. Ende seyden ghi leuer etere, vaert wel schuutkin houf houf, dat waren huwe roupen, hoe vaerdy nv, ende si toochden hem dye fyghe, ende daden hem vele schimps. Ende hi seyde haddic te doene met lieden van redene, ic soude noch wel connen te mijnder ontschult gheraken, ende verantwoorde hem, segghende dat hy in gheenen sticken mesdaden en hadde. Ende terstont was hy weder vp den steen gheleet, ende hem waren twee groote boeyen aen ghedaen, ende bi hem waren gheleyt sommeghe ambochtslieden, ende hi ghecte noch met hem lieden, ende met die vander stede, hoe dat si so onghenadich ende onkerstelic waren, poorters vander stede te legghene vp sulc een pijnbanc als die was. Waer vp doe dye hem bewaerden hem antwoorden, gheckende met hem, ende seyden. Ick bringhe hu een droncxken, maect goet chiere, ghi sult oock vp den banc gheraken, ende dat corts met vaert wel schuutkin, twelck nv inden gront gheseylt es, aldus ende in deser manieren ghecten si met hem.

[Den.xvi.sten en den xvij.sten dach van Maert]

¶ Item den.xvi.sten dach van Maerte, ter ordonnancie ende omme die exame van iusticien ten.x.hueren voor der noene, so was vp die marct in tparc ghemaect een schauot wel hooghe ende breet, daer vp datmen den voorseyde examineren ende pijnen soude, omme dat elck soude hem moghen sien cleene ende groot, in welcker examen hem alder eerst aen gheleyt was, als dat hi wel wiste van als hertoge Kaerle te Morack was, ende dattet eens deels mede sijn schult was, als dat hi daer doot bleef, ende veil meer ander sticken, als vanden paeys te brekene van Vranckerijcke ende den lande van Vlaendren, ende vanden traysoene van Therrewane ende van sint Omaers, ende van vele andere taxacien van penninghen ende foortsen ende exactien exactien ende quade voortstellen vp tghemeene volc, dit was hem al vertoocht eer hi ten schauotte ghebrocht was.

¶ Item vp den seluen dach tsachternoens, ontrent den.iij.hueren, soe was die voorseyde ghebrocht vp tschauot dat daer toe ghemaect was, ende daer was hy begonnen te examineren van vele saken dye sonderlinghe

[fol. CC.xxxvi.v]

waren eerst dat hi contrarie sijnen eedt ghedaen hadde, een wapeninghe te makene vp tlandt vanden hertoghe Phelips, grotelick te sijnen quetse. Ende hoe dat hi wel wiste van tvolc daer omme dat trac den Bisschop van Luycke, mijn heere van Iselsteyn ende die Marcgraue van Antwerpen. Twelcke hi al loochende, ende was nochtans ghepijnt. Maer kende dat hy wel wiste dat tvolck vanden Roomschen coninck huyt ende in ghereden soude hebben vp die stede van Ghendt orloghende, maer hadde ghebeden datmen gheenen prysen in Brugghe ghebrocht en soude hebben, wantet eens stede es van coopmanschepe, ende nyet met een stede van orloge also hi daer verkende, maer seyde totten coninc, rijdt huyt ende in thuwer gheliefte met huwen volcke, ic en wilt nyet weten. Ende kende noch dat hi vanden Rade was vanden coninc, ende mijn here van sinte Beertins, ende mijn heere van sinte Beingy. Ende badt als doe omme tot sanderdaechs te moghen rustene, omme die waerheyt te bet te moghen verclaersene, want dye sticken groot ende lastich waren diemen hem te laste leyde, daer hi qualic als doe aen tkennen commen wilde. Maer dye wet vant in haren Raet datmen hem respijt gheuen soude tot sanderdaechs ten.viij.hueren, twelc so ghebuerde. Ende was doe den.xvij.sten dach van Maerte.