Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xiii.sten dach van Maerte]

[fol. CC.xxxv.r]

Item vp den.xiii.sten dach van Maerte, so wort gheuanghen die Capiteyn van Hulst tsmorghens vrouch inden nuchtenstont, ende wordt gheuanghen van drye ionghe ghesellen dye hem ghemoetten int bleckerstraetkin beneden der stroobrugghe, die welcke hem vraechden, waer hi ghinck ende wie hi was. Ende hy seyde dat hi een waker was vander Cruyspoorten. Doen seyden si dat en mach niet sijn, want ghi en hebt stock noch wapene. Doen seyde hi ghesellen moet ict hu ommer segghen, ick hebbe bi een heymelic vraukin gheslapen. doen seyden si, wy en ghelouen hu noch niet, waer wi bemoeden dat ghi sijt een van onsen vianden, ende dat hooren wy wel. Doen antwoorde hy noch eens ende seyde ten es soe niet, maer ick men den capiteyn van Hulst, ende ic beloue hu lieden, eest dat ghy my wilt laten gaen, ick sal hu lieden gheuen twee hondert croonen. Ende dye wijle dat si aldus met hem spraeken, liep eene van hem lieden cloppen ten huyse vanden Schouteetene, ende seyde wi hebben den Capiteyn van Hulst gheuanghen, sendt met ons ghesellen dat wi hem moghen vp den steen beweghen. Doen quamer met hem lieden ghesellen diere handt aen sloughen, ende brochten hem gheuanghen op den steen. Ende vp den seluen dach so was dye voorseyde Capiteyn gheexamineirt ende ghepijnt, daer hi leedt ende verkende dat hy mede een vpstelder was van het vrye een let te makene, waer of dat den Roomschen coninc ghehadt soude hebben.viij.duysent croonen, twelcke hy ende meer andere deden gheuen den schamelen landtslieden. Ende hoe dat hi aen nam met.xxv.ghesellen die stede van Hulst in te nemene, ende hem seluen daer capiteyn te makene contrarie den ghemeenen lande, ende ghecreech te Hulst binnen noch.xl.ghesellen te sijnder hulpe, waer mede dat hi trac te Moerbeke waert al daer hi verbarnde een ghedeel huysen. Ende voort hoe dat hi des vrydaechs den eersten dach van Sporcle, daer te voren mede quam inden burcht, ter assistencie vanden Roomschen coninck met al sijnder macht Voort leet noch al daer, hoe dat hi een mede was dye hielp den paeys breken van Vranckerijcke van tiaer.M.CCCC.ende lxxxij.totten iare.lxxxvij.toe. Ende omme alle dese voornomde sticken die hi daer leedt ende verkende, was vp dye marct onthooft vp den.xiiij.sten dach in Maerte.

[Den seluen.xiiij.sten dach van Maerte]

¶ Item vp den seluen.xiiij.sten dach van Maerte, soe was Claeys van Delft ghebrocht vp tschauot met den cruyce in dye hant, omme onthooft te wordene ende te steruene metten sweerde. Ende vp tschauot commende met den cruyce in die hant, so viel hi neder vp beede sijn knien, biddende den ghemeenen volcke omme die doot die God starf om gracie om sijn lijf te houdene, hem lieden biddende dat si aenschau nemen wilden vp sijne onnoselheyt, want van al tghene daer hy inne mesdadich was, dat hijt hadde moeten doen by bedwanghe ende ontsich van sijn schoon vadere, wiens dochtere dat hi ghetraut hadde. Ende tvolck ghemeenlic considererende dye wreetheyt ende die strafheyt vanden seluen schoon vadere, worden verweckt tot compassien. Ende riepen met ghemeenen voyse, gracie ouer den seluen Clays van Delft. Ende daer was hi vp ghedaen staen, ende sijn lijf was hem ghegheuen vanden.iij.leden slandts van Vlaendren ende vander gheheelder Wet van Brugghe, daeromme hy seer blijde was met groter redene. Ende doen ghinck hy vanden schauotte tot alle die Dekenen rontomme die marct, ende bedancte hem lieden vander gracie dye si hem ghedaen hadden, ende daer mede hadde hi alle sijn absolucie.