Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.ix.sten en den.viij.sten dach van Maerte]

Item vp den.ix.sten dach van Maerte, so was ghesonden aen ons van Brugghe eenen brief, die ghescreuen was vp den.viij.sten dach van Maerte, hoe dat si screuen vriendelicke groetenesse aen ons van Brugghe, segghende voort dat wi wel voor ons sien souden, ende den Roomschen coninck wel souden pijnen te bewarene, want si verhoort hadden dat die van Ghendt wel meenden den coninc huyt Brugghe te ghecrijghene in hare stadt, ende dat si daer vp huyt waren. Twelck hu heren van Brugghe wel vp commen soude, endt so ghebuerde. Aldus bidden wi hu dat ghy daer goede voorsienicheyt in hebben wilt, want alle die heren vanden duytschen landen, ende alle dye coruorsters hebben ghesworen, in dient so ghebuerde, ende ghi lieden hem liet commen inden handen van die van Ghendt of vanden fransoysen, dat si Brugghe daer omme souden te niete doen, man, wijf ende kint. Ende ontboden voort ons van Brugghe dat wy souden commen ter dachuaert te Mechelen, by onsen ghenadeghen heere ende erfachteghen Prinche, ende bi die ghedeputeirde vanden coruorsters, die welcke daer waren, ende beyden naer die dachuaert, die welcke eerst was huyt gheroupen te Ghendt, ende deene en quam totten anderen niet, dan die drie leden tslants by malcanderen.