Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xi.sten dach van Maerte voorseyde]

Item vp den.xi.sten dach van Maerte voorseyde, snachts ontrent den.xij.hueren inden nacht, soe sandtmen vijf lieden te Cortrijcke waert, omme dieswille dat Ian van Coppenolle daer inne wilden seynden garnysoen vanden Fransoysen. Maer die van Cortrijcke om den laetsten man te waghene, en wilden gheen fransoysen in nemen, maer screuen aen die van Brugghe, wilden si eeneghe lieden daer inne seynden van Ghendt, van Brugghe, ofte van Ipre, sy waren hem lieden wellecomme, al waert dat ware tot iiij.of.v.duyst toe.

[Den.vij.sten dach van maerte]

¶ Item vp den.vij.sten dach van maerte, was die rekeninghe gedaen vander stede, byder welcker rekeninghe wel bleec dat die stede qualick gheregiert hadde gheweist. Vp twelcke eeneghe die seere wijs wilden wesen seyden, waert bi al dien datmen den Coninc wel ondervraechde met goeden ouden gheleerden mannen, hi soude onse stede wel wat segghen, ende so souden ooc die heren die te Ghendt gheuanghen laghen. Ende weit dat ghy hu wachten moet van eenege die ter marct ghecommen sijn, want si huyt sijn om hu lieder verderuenesse. Ende weit dat ghy hu nyet te seere en moet betrauwen, want daer sijn eeneghe die hu gheen profijt noch duecht en ionnen van sommeghe heren die ghi betraut. Ende ooc mede so hebben wi ons wel te wachtene vanden fransoysen, want si ons ouer vier iaren gheerne verdoruen hadden, hadden si gheconnen ende noch souden, in dien si meester van ons consten gheworden. Ende weit dattet wel redelick ende oorbor ware, dat die weerlicke priesters als si haren dienst ghedaen hadden, dat si by ons quamen staen ter marct in die wapene, ende siet eer dat ghy vander marckt gaet, dat ghi pijnt te vercrijghene alle huwe rechten ende preuilegien. Dyt ende deser ghelijcke redenen waren ghealligiert van eeneghe die seere montvroet waren, ende vele bestiers hadden.