Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xi.sten dach in Maerte]

Item vp den.xi.sten dach in Maerte, soe was gheordonneirt eene ordonnancie van eender wapeninghe te houdene, ende te gane int harnasch, vp die maniere so die van Ghendt doen alle iare te half vastene. Ende dyt was begonnen die eerste reyse, den.xi.sten dach in Maerte, tsauents ten.x.hueren inden auent, beghinnende te gane alle die hooftmannen ende lij.Dekens, elc naer sijn hoocheyt met haren standaerden, met trompetten ende trommelen in properder ordonnancie, ende namen den eersten auent haren ganck vander marct voorby den bijtre, duer die wapenmaker strate tot Sint Ians brugghe, lancx der speghelmakers reye duer Dinghelsche strate duer die Rudderstrate, keerende in die bogaertstrate duer den crommewale ouer dye stroobrugghe voorby den Caermers ouer tproosche duer die peper strate, keerende alsoo naer doude muelen brugghe duer dye hoochstrate, duer dye burch, duer die breydelstrate, also weder ter marct, daer orlof aen malcanderen nemende.

¶ Item den.ij.sten auent ghinghen si vander marckt duer die wulhuys strate ouer die grote Eechout brugghe, ouer die vlasbrugghe, duer die braemberchstrate, duer die witte leirtauwerstrate, commende lancx den hoye duer dye vlasmarct, voorby den Nazarette totten anckere plaetse ouer sinte Marien brugge, voorby tvleeschuys, duer dye steenstrate naer sint Saluators, duer die dweerstrate, duer die wulfhaghestrate duer den houden sack, keerden ouer die lee brugghe, duer shergheer wijnstrate voorby die bornecamere, ende alsoo weder ter marct als voren.

¶ Item den derden auent namen si haren ganc vander marct eerst duer sint Iacobs strate voorby thuys van meester Ian die groot daer den Roomschen coninc ghelogiert was die welcke hem lieden daer alle sach passeren, daer hi inne verblijde, sinede so vele frisch volcx by een, ende dat si alle auende paeysiuelic schieden. Ende es te wetene dattet alle auende lancx so schoonder was om sien, ende wantet doe den derden auent was, so wast seer schone om sien. Van daer ghinghen si over die ezelbrugghe, duer sherboonems strate ter baelge commende totter Vlamijncbrugghe, voorby den Augustijnen, duer den langen wijnckele, ouer doosterlinge plaetse, duer tghent of totter Caermers brugghe, keerende lancx der noortsijde vander Reye tot sint Ians brugghe, duer die zouterstrate ouer die buerse, duer die vlaminc strate, also weder ter marct. Ende hier of hadden si brieuen ende besegeltheyt vanden.iij.leden tslandts van Vlaendren, datmen dat alle iare ghecontinueirt soude hebben, ende dat soude naer dien tijt altoos ghebuert hebben alsmen die wet van Brugge vermaect. Te wetene den tweesten dach van Septembre, dan soudt den eersten auent gheweist hebben, ende den.ij.sten als die wet vermaect ware, ende tsander daechs daer naer, het derde vanden voorseyde aweete.etc. End dyt was gheordonneirt ontrent dier tijt, omme in dien hem yement ghemessuseirt hadde int regieren vander stede ofte eeneghen dienst vanden Prinche, dat sy dan daer of correctie versocht souden

[fol. CC.xxxiiij.v]

hebben ghedaen te sijne. Maer es te wetene dat dese ordonnancie maer twee iaren en gheduerde, maer was corts als alle dinck vp sijn stede was, dye ordonnancie weder te nieten ghedaen, want die heeren waren wijser diet weder of stelden, dan dye ghene diet ordonneirden, metsgaders als een ghemeente die ouerhant heift, si stellen dicwils vele saken voort, die niet vele en doogen als doe ende te meer stonden wel ghebleken heift, want si doe vele saken voortstelden, daer omme dat die stede van Brugghe in groter desolacie gheweist heift ende noch es, ende was ghenouch een beghinsel van huere declinacie, welc gode gheclaecht sy.etc.

waer of dit woort de warachticheit prouft
Tes beter verheert tsijne dan verbouft.