Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Item vp den.xi.sten dach van Maerte, so sandt mijn here van Santrayn te Brugghe eenen brief, die welcke sprack in deser manieren.

Vriendelicke groetenesse aen hu mijn beminde vrienden van Brugghe. Weit hoe dat ic ter Sluys ghecommen ben huyter name van Phelips van Rauesteyn, omme te houdene dye stede ende beede dye Casteelen, ten behouue ende huyter name vanden hertoghe Phelips, ende ter weluaert vande stede van Brugghe, ofte hu lieden yement yet wilde mesdoen om hu lieden hulpe ende bystant daer yegens te doene, ende omme dat ghi lieden ende andere cooplieden, soudt moghen gaen ende keeren sonder eenich belet. Ende pijnt altijt te hebbende goeden wijsen Raet, ten behouue vanden hertoghe Phelips ende sijnen lande van Vlaendren, dat biddick hu lieden vriendelicken.etc.