Item vp den.xi.sten dach van Maerte, so waren ghelesen in die halle diueersche ordonnancien bi die vander wet gheordonneirt,
vanden welcken dat sommeghe pointen den temmerlieden, metsgaders den.xvij.neeringhen nyet wel en ghenouchden, omme datmen so seere sochte middele ende maniere om hem lieden van der marckt te ghecrijghene, ende seyden dat die.xvij.neeringhen noteren souden alle die pointen die hem lieden niet en ghenouchden. Ende die temmerlieden namen haer pingioen, ende lieper mede huyter halle int parc vp die marct, ende riepen alle die ons wel willen, die commen bi ons of wi houdense voor vianden. Ende naer dit woort volchden die.iiij.neeringhen, ende den smet, dye naelde, ende voort al dandere, elck met sijnen pingioene, ende ghinghen van daer in ordonnancien tot inden burch, ende bleuen daer staende tot dat die capiteyn quam. Ende doe seyden si aldus, heere Capiteyn wy begheeren aen hu dat ghy die camere wild doen scheeden of wi sullense alle doot slaen die daer inne sijn, ende wi willen hebben ter marct drie persoonen die wi hu segghen sullen, omme te examineirene van dies men hem lieden vraghen sal. Ende die twee die excuseirden hem lieden als dat si vander ordonnantie vanden Schouteeten niet en wisten, maer begheerden vp dye strate te gane ende presenteirden haer lieder lijf ende goet tallen tijden ende tallen hueren bereet te sijne, ende te commene te wetten ende ter iusticien, talder huere alsment begheeren soude, ende presenteirden te commene in die presencie van hem lieden, die hem lieden souden willen segghen of aenlegghen metter waerheyt, dat sy yet vander saken wisten. Ende Clays van Delft was ghecondempneirt te steruene, vanden welcken die voorseyde badt ootmoedelick om die doot die god starf, dat men hem gracie ende respijt gaue tot sand
Auteursrechtvrij