Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.viij.sten en den x.sten dach van Maerte]

Item vp den.viij.sten dach van Maerte, soe was gheuonden te Male buyten der stede van Brugghe, ten huyse van eenen Cupere een instrument van eender tonne met barderen, als vloten, waer mede dat Clays van Delft ouer die veste vander stede gheuaren soude hebben,

[fol. CC.xxxiij.v]

want dese cupere was sijn gheuare ende soude hem also ouer gheholpen hebben. Ende dit wartmen gheware bi eenen wijue die te Male ghinc melcken, ende die sach den cupere dit engien maken. Ende in die stede commende so vertrack sijt haren meestere, ende die gaft te kennene in tghemeene. Ende dyt aldus wetende, trocken.x.of.xij.ghesellen te Malen waert, ende commende ten huyse vanden cupere si vonden tengien vulmaect, ende doen vinghen si den cupere ende namen tselue engien mede, ende brochtent ter veste aen tcleen waterhuysekin teynden der Caermer strate, daer Clays van Delft inne was, alsoo hi hem lieden verclaerst hadde. Ende doen belasten si den cupere dat hi doen soude metten engiene ghelijc als hy ghedaen soude hebben. Ende doe bestelden si tengien in die veste ende satender vppe met hem vieren, waer of dat deene in die veste viel, maer hi was weder huyt gheuischt vanden anderen die buyten bleuen, ende quamen also ouere met hem dryen vp tselue engien tot aen twater huysekin, daer si aen clopten, ende si deden den cuper alleene spreken, ende riep tot sijn gheuare dat hi daer ware metter ghereeschepe. Ende hi antwoorde ic salt open doen ende commen tot hu, twelc hi also dede. Ende doen sach hy dander twee die hem vinghen ende wel vast hilden. Doen badt die voorseyde man hem lieden dat si hem wilden laten gaen, hy soude hem lieden gheuen iij^c.pont grooten, dye welcke penninghen si seyden dat si niet en sochten, maer seyden hem hi moeste mede gaen, ende brochten hem metten daghe gheuanghen ter marct, aldaer hi terstont gheexamineirt was ende ghepijnt Ende hi seyde dat hi niet mesdaen en hadde, want sijn behuwede vadere, wiens dochtere dat hy ghetraut hadde, die dede hem doen bi foortsen ende bedwanghe al tghene dat hi ghedaen hadde, ende en wiste ooc van gheenen secrete van huerlieder Raet, maer hadde hem lieden wel hooren segghen, dat si tghemeente noch wel dwinghen ende castyen souden bi middele of bi foortsen. Ende dat hoorde ooc die wet ende neghen sware Dekens, daer mede was hy vander banc ghedaen, ende hi seyde datment den clerck vanden bloede vraghen soude, diet bet wiste dan hi, want hy hadde een boucxken daer si alle in stonden bi dizenierschepen, also dattet toe ghegaen soude hebben, midts dat hy clerc was vanden bloede. Ende dye voorseyde was so seere ghepijnt dat hi nauwelic ghegaen en conste. Dit was vp den.x.sten dach van Maerte.