Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.v.sten dach van Maerte]

Item vp den.v.sten dach van Maerte, so was die rekeninghe ghehouden vander stede van Brugghe, hoe dat Pieter lanchals hadde ghehouden knechten achter hem gaende, die welcke knechten hadden der stede ghecost drye waeruen.lxx.libra grooten, ende noch drye waeruen.xxx.libra Ende mijn heere van Dudzeele, die hadde ooc also vele knechten, insghelijcx alle ten coste vander stede. Ende den watergraue als Burchmeester hadde ooc also vele knechten. Ende den Cancelier hadde noch meer voor sijn deel om sijn knechten, ende alle dander deelden mede haerlieder paert ende porcie, ende hilden aldus dese knechten, omme tvolc tondere ende in grooter subiectie te houdene. Ende es te wetene dat midts deser settinghe, die verachterhede vander stede van Brugghe, drouch die somme van.xxij.duysent ponden grooten, sonder die rekeninghe noch van eenen haluen iare, die als noch niet ghedaen en was, noch ghepasseirt.

[Den.vi.sten en den den vierden dach van Maerte]

¶ Item vp den.vi.sten dach van Maerte, so hadden die van Hulst verbarnt ende berooft die prochie van Assenede, ende tvolc vermoort, ende gheuanghen. Want vp den vierden dach van Maerte, so hadden die van Ghendt gheweist te Hulst, ende waren daer vele gheuanghen ende doot ghesleghen, twelck quam bi haerder quader ordonnancie ende voorsienicheyt, want en hadden ghedaen die fransoysen vanden garnisoene van Ghendt die hemlieden ontsedt daden, si souden alle ghebleuen hebben.

[Den vij.sten en den viij.sten dach van Maerte]

¶ Item vp den.vij.sten dach van Maerte so ontboden die van Hulst alle die passaedgien daer ontrent gheleghen, of si hem lieden ghelt seynden wilden, om beurijt te sijne van brande, den welcken brief ghesonden was te Ghendt, ende die van Ghendt sonden den.viij.sten dach van Maerte die copye te Brugge. Ende noch meer, hoe sy vernomen hadden dat dye Coninck qualic bewaert was, aengesien dat hi anders screef dan hy gheseyt hadde te doene, dat was die garnisoenen te doen lichtene, twelc hi niet en dede, maer fortifieerden hem lancx so sterckere, twelc die van Ghendt wel vernamen, ende baden die van Brugghe dat si bet toe sien souden.