Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xxiij.sten dach in Wedemaent]

Item vp den.xxiij.sten dach in Wedemaent, so quam die Roomsche Coninck binnen der stede van Brugghe, met alle sijnen gheselschepe, ende den paeys wiert ghemaect, ende hy vergaft al van dat te voren gheschiet was, sonder thien persoonen, dye welcke buyten den voorseyden paeyse ghesloten waren.

¶ Item een lettel tijts hier te voren so was verbarrent van dye vander Sluys een schoon nyeu huys, twelcke die van Brugghe hadden ghedaen maken, omme die van der Mude daer inne recht ende wet te doene naer doude costumen.

[Den laetsten dach van Wedemaent]

¶ Item vp den laetsten dach van Wedemaent, so was die Wet van Brugghe vermaect byden Commissaresen vanden Roomschen Coninck. Ende waren doe Burchmeesters ghemaect vander stede van Brugghe mer Ioos van Vassenare, ende mer Ioos van Haelwijn. Ende mer Pieter lanchals was doe ghemaeckt Schouteetene vander stede van Brugghe, ende alle dye Dekenen waren vereedt huyter name vanden Roomschen Coninck, ende bleuen aene tot Septembre.Anno.lxxxvi.daer naer eerst commende.

¶ Item in dye selue maent van Wedemaent voorseyde, so quam mer Phelips van Rauesteyn van achtere, in tgroote Casteelt ter Sluys, met groter menichte van volcke, ende hy dede ruymen alle dye duytschen die in tcasteel waren, ende ooc int tcleen casteel, ende ooc alle die duytschen die binnen der Sluys waren, ende dye fransoysen vloden oock heymelick wech, maer die schepen bleuen binnen der Sluys, ende men sochte allomme die Fransoysen, ende dye sommeghe waren gheuanghen. Ende terstont quam die bastaert de Baenst, metsgaders meer andere, ende dede ontslaen alle die gheuanghen die laghen gheuanghen van des Roomschen Conincx weghe. Te wetene die van sijne querele waren. Ende Phelips monseur stelde alle saken in ordonnancie, eer dat hi van daer track, ende die van der Sluys bleuen met paeyse.

¶ Item corts daer naer vertrac die Roomsche coninck huyter stede van Brugge met al sijnen gheselschepe te ghendt waert, daer hi eerlick ontfanghen was. Ende terstont gheschiede een groote beroerte binnen der stede van ghendt van twee partyen vp dye veebrugghe, maer het was ghepaeyseirt byder wet, ende dupstelders van dien waren onthooft.