Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe dye Hertoghe Maximiliaen, beswoer als Rooms Coninck, Tlandt van Vlaendren, als Monboor van sijnen sone, den Hertoghe Phelips van Bourgoengien, erfachtich Graue van Vlaendren.

[fol. CC.xxviij.v]

ITem vp den seluen tijt in Wedemaent.lxxxv.so beswoer hertoghe Maximiliaen als Roomsch coninc tlant van Vlaendren, als momboor van sijnen sone den hertoghe Phelips, erfachtich graue van Vlaendren, welcken sone hem daer eerlicke ghepresenteirt was, te sijnen blijden in commene. Ende dit wet van Ghendt was ooc vermaect byden Commissaresen vanden Roomschen coninck.

[Den.xxix.sten dach van Wedemaent]

¶ Item vp den.xxix.sten dach van Wedemaent, int selue iaer vertrack die Roomsche coninc huyt ghendt vp die noene, ende voerde sijnen sone met hem den ionghen hertoghe Phelips in eenen waghene, ende trocken naer Bruessele, daer si eerlicken ontfanghen waren. Ende hi stelde daer ooc alle saken in paeyse ende in goeder ordonnancie, ende die wet was daer ooc vernyeut, ende dye malefactuers waren ghecorrigiert.

¶ Item corts daer naer track hi met sijnen sone naer Mechelen, ende met alle sijnen state daer hy oock eerlicken ontfanghen was. Ende daer bleef hy seer langhen tijt, sonder in Vlaendren te commene, so men hier naer wel hooren sal.

[Den.xxix.sten dach in Ougst]

¶ Item int iaer van.lxxxvi.up den.xxix.sten dach in Ougst, so quam die Keyser Frederic van Roome, vader vanden Roomschen coninck binnen der stede van Brugghe met schoonen state, daer hi rijckelick ende eerlick ontfanghen was, ende sadt in eenen osbare, want hi een seere oudt onuermueghen man was. Ende in sijn incomste was groote triumphe ende chierheyt ghedaen binnen der stede van Brugghe. Eerst so was die cruyspoorte al behangen met rooden laken, verchiert met diueersche schilderye, ende sijn sone dye Roomsche coninc quam met hem inne, rijdende neffens sijnen osbare, met schonen state Ende die Baliu ende die Schouteetene, ende dye gheheele wet van Brugghe waren alle ghecleet met rooden lakene van damast, ende met rijckelicke clocken vanden seluen gheuoert,

[fol. CC.xxix.r]

al met swarte tafta. Ende alle dye nacien reden yeghens hem, al meest met sijden abijten van diueerschen colueren, ende elcke nacie hadde een huys in die hoochstrate verchiert, elc om rijckelicst behanghen met lakene, ende verchiert met diueerscher schilderye, ende voor elc huys grote menichte van barnende toortsen. Ende sonderlinghe die oosterlinghen waren alle te peerde in groter menichte, alle ghecleet met rooden lakene, ende hadden ooc een huys vp die marct, seere rijckelick behangen met rooden lakene, ende verwapent metter wapene vanden keysere ende vanden coruoosters, maer des keysers wapene stont seer chierlic inden middele, ende hadden ooc voor haerlieder huys grote menichte van barnende toortsen. Ende alle dye hooftmannen ende Dekens waren alle nyeu ghecleet in rooden abijten, hebbende aen den slijnckeren aerm eenen minneknop van ghewrochten coordekins van sijden, ter eere ende weerdicheyt vander blijder incomste van den keyser voorseyde. Ende vander poorte totten houe toe, so waren alle die huysen aen beeden sijden vanden straten behanghen met lakene ende met tapijtserye, ende vele huysen verchiert met lichte van barnende toortsen Ende waren ghetoocht te diueersche houcken vanden straten vele schoone ende rijckelicke stomme personaedgien van diueerschen ende vreimde hystorien seere schoone gheordonneirt. Ende alle die peerden dye yeghen den keyser ghereden waren, bleuen staende vanden houcke vander Vlamincstrate aen beede die sijden vander marct tot dat die Keyser met al sijnen gheselschepe gheleden was. Ende eeneghe vanden wethouders met eenen Pensionaris waren hem verbeydende in thof, al ghecleet sijnde met root laken van damast als voren, daer voor hem een schoon Relaes ghedaen was, ende seer eerlicke was ontfanghen. Ende sauents waren binnen Brugghe vele schoone vieren ghemaect, ende vele ghenouchten bedreuen van danssinghen, ende van andere saken, te sijnder blijder incomste. Ende dyt es al in tcorte ghestelt alsoot gheschiede.

¶ Item corts hier naer wasser een gheuanghen, die welcke hem lange gheabsenteirt hadde ten Iacopijnen ende elders, ende hadde gheweist langhe tijt sonder eten ende sonder drincken, want hem neyement logieren noch herberghen en wilde, metsgaders dat hy was een vanden.x.peroonen dye buyten den paeyse ghesloten waren, so dat hi ten sijne gheuanghen wiert als voorseyde es, ende vp den steen gheleet, daer hi een wijle tijts lach Ende daer naer so was hi te Brugge vp dye marct onthooft, ende oock den clerck vanden bloede, ende sommeghe andere die vanden.x.peroonen waren die buyten den paeyse ghesloten waren, daer hier voren of gheroert es. Ende dese iusticie was ghedaen vp dye marckt als voorseyde es, in die presencie vande ghecommitteirden vanden Prinche.

¶ Item es de wetene naer desen tijt dat die van Ghendt ne waren niet seer wel in die gracie vanden Roomschen coninc, ende hi was vele meer te Brugghe dan te Ghendt.etc. Ende aldus stont een wijle tijts, maer den ionghen Hertoghe Phelips met sijnen state bleef altijts te Mechelen, ende alle die meeste menichte vanden heeren hielden hem altijt in Brabandt. Ende men dede wet in alle dye steden van Vlaendren, huyter name vanden coninck vanden Romeynen, als voocht ende momboor van sijnen sone den ionghen hertoghe Phelips, onsen natuerlicken ende erfachteghen Prinche. Ende dit was al int iaer van.M.CCCC.ende.lxxxvij.