Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Vp den.xxviij.sten dach vander seluer maent van Meye.

Anno.M.CCCC.ende.lxxxv.so was een grote beroerte in tcleen casteel buyten der sluys ghenaemt den thorre van Bourgoengien, onderlinghe onder hem lieden van binnen, soe dat eenen ghenaemt Rogier de Mol, metsgaders Clays vanden beckene, ende Pieter snellaert, die daer gheuanghen waren, metsgaders andere haerlieder medepleghers, hadden alyanchie ghemaect ende droughen ouer een, dat si bedwinghen wilden den capiteyn metsgaders dat si die gheuanghen waren, daghelicx aen hem verstonden datmense in Vranckerijcke voeren soude, ende midts dat hi daghelicx conuersacie maecte metten fransoysen, so dat si lieden vp den dach voorseyde, snuchtens ontrent den.viij.hueren, ende midts datter vele vanden Saudeniers in die stede als doe waren, ende sommege ander noch sliepen, so ghinghen si terstont in die camere vanden Capiteyn wel voorsien, ende Pieter snellaert ghecreech sijn boeyen of, maer Clays vanden beckene niet, ende sloughen hant aen den voorseyde capiteyn, ende aen eenen die by hem was. Ende die Capiteyn stelde hem clouckelick ter weere, soe dat hy den voorseyde Rogier de mol bycans sijn eene hant of slouch, midts den welcken dandere perplex waren, ende die Capiteyn met eeneghe vanden sijnen ontschoot hem lieden tot vp die fortresse bouen, twelck si clouckelick hilden, so datmen bouen nyet gheraken en conste, ende hy riep om hulpe ende bystant van dyen vanden grooten casteele, ende die beneden waren die waren in groter tribulacie deen yeghen dandere. Ende ontrent den.ix.hueren voor die noene, so wordent die vander stede gheware. Ende dye beneden waren staken ten diueerschen veynsteren ende gaten huyte groote pertsen met root saey ende wit lijnwaet, als bannieren, omme sercours te hebbene van sconincx volc dat in die schepen lach, maer si en hadden gheen verstant van dien. Ende als doe was capiteyn vander Sluys Boudin Heyndricx, ende corts daer naer Ian Heyndricx sijn broedere. Ende terstont so quamen die vander Sluys metsgaders den duytschen dier laghen ouere met booten, met groten hameren, ende andere gheweere. Ende die duytschen haelden booten ouere tot int watere vanden casteele, ende namen groote leederen ende sloughen met hameren diueersche yseren ende traelgien in stickene, dye in sommeghe veynsteren stonden, ende clommen also binnen in tcasteel, want men mochte hemlieden niet ghedoen, metsgaders dat die van bouen met hemlieden waren. Ende binnen sijnde, soe smeten si diueersche dueren opene, so dat si gherochten byden capiteyn, die welcke hem lieden bewees dye prince-

[fol. CC.xxviij.r]

paelste vpsetters waren, so dat si te gader neder quamen, ende versloughen sonder eenich ontfaermen Rogier de Mol, ende Maertin vaer die busschietere, ende noch vijf visschers van Heys ende van Blanckeberghe eerbaer gheuanghen mannen, die daer onnooselick aen haerlieder doot quamen. Ende daer was oock doot gheschoten een Ionchere vanden duytschen, ende Clays van beckene was seere ghequetst in sijnen hals, soe dat hi corts daer naer vander seluer quetsuere starf binnen der stede vander Sluys. Ende daer waren gheuanghen Clays vanden beckene voorseyt, Pieter snellaert van Ghendt, ende Iacob van Malen, dye daer te voren Casteleyn vanden voorseyde Casteele gheweist hadde, ende sijn goed was al gheconfisqueirt, ende wijf ende kijnderen warende huyt ghestelt, ende mede gheleet ter Sluys in dye vanghenesse. Ende aldus ghecreghen die vander Sluys het casteel metsgaders den duytschen.

¶ Item vp desen seluen tijt absenteirden ende hem vertrocken huyt der stede van Brugghe diueersche persoonen, vanden welcken personen twee Typre gheuanghen waren ende ghebrocht binnen der stede van Brugghe, ende corts daer naer so was ooc gheuanghen den Clerck vanden bloede, dye welcke drye persoonen waren corts daer naer alle drie onthooft vp dye marckt vp een schauot. Twelc was ghedaen huyter name vanden Roomschen coninck.etc.