[Den.ij.sten dach van April Anno.lxxxi]
ITem vp den.ij.sten dach van April Anno.lxxxi.vp eenen dysendach in die goede weke, so drouchmen den doden lichame van mer vrauwe van Bourgoengien Marie, wijlen onse princersse, eeneghe dochter vanden Hertoghe Kaerle, gheselnede vanden edelen Hertoghe Maximiliaen, in dye kercke van onser vrauwen in Brugghe, met schoonder ordonancie, ende eerst so ghinghen in dye processien die obseruanten reziderende bi Brugghe buyten der ezelpoorte, ende dat was deerste reyse datmense noeyt in processien sach gaen metten anderen, ende naer hem lieden so ghinghen die.iiij.biddende oordenen, ende daer naer die eechouters, ende daer naer alle die Collegien van Brugghe.
¶ Item dye van Brugghe ende vanden Vryen quamen naer die Prelaten, ende die van Brugghe deden vele wassen toortsen draghen metter wapene van Brugghe voor hem lieden, ende die vanden Vryen in sghelijcx.
¶ Item daer naer quamen.C.aerme lieden ende.L.al nyeuwe vercleet in swarten abijten ende met Raucapproenen, elc met een barnende toortse in die hant van vier ponden, verwapent met der wapenen vanden prinche ende van der princersse, van ghelijcke in malcanderen ghedeelt, ende elck persoon hadde een schildekin voor sijn borst vander seluer wapene. Ende ooc mede een grote menichte van houelinghen ghinghen daer naer alle in swarten abijten.
¶ Item voor tlijc ghinghen.xij.Heraulten, vercleet met tornikeelen vander wapene, ende die iiij.achterste Heraulten die ghinghen verslooft ende ontrent den lijcke so ghinghen vele heren, ende daer waren.iiij.edele mannen die dat spancleet droughen bouen den lijcke, ende dat cleet was ten lijcke waert gulden laken, ende bouen van swarten fluweele. Voort so lach vp tlijc een root gulden laken met een cruyce van wit laken van damast, ende die boorden waren van swarten fluweele, ende vp tlijck lach eenen gulden hoet met peerlen ende ghesteenten verchiert, ghelijc sulck eender princersse toe behoort. Ende het lijc was ghedreghen neffens der eerde, alsoomen grote edele mannen ende vrauwen es ghecostumeirt van draghene.
¶ Item naest den lijcke volchde dye Hertoghe Maximiliaen met een langhe swarte huycke, ende gheslooft met eenen Raucapproen, daer naer quamen noch.v.grote heren die van haren bloede waren, alle gheslooft als voren, daer naer quamen drie edele vrauwen in bonte swarte mantels, ende met Raucapproenen ooc gheuoedert, deene naer dandere, ende elc vanden vrauwen was gheleet van eenen edelen man. Ende naer hemlieden volchden noch vele edele vrauwen ende ioncfrauwen met swarte ghecleet, ghewimpelt met lijnen hooftcleederen, ontrent haerlieder hooft. Ende dit was den staet van den houe.
¶ Item van sijns heren hof tot onser vrauwe kercke, so stonden in properder ordonnancien, die poorterye van Brugghe, ende die ambachten, ende die vanden Vryen, elc met een barndende toortse voor hem lieden, ende elcke toortse hadde een schildekin van haerlieder wapene, ende also bleuen si staende tot dat tlijc gheleden was ende ghedreghen tot in onser vrauwen kercke te Brugghe.
Auteursrechtvrij