Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item dye princersse Marye wort seere met siecten beuanghen]

[Den.xxvij.sten dach van Maerte]

Item dye princersse Marye wort seere met siecten beuanghen, als datmen vp den.xxvij.sten dach van Maerte een generale processie drouch ten Saertreusen buyten Brugghe, daermen dat weerde helich bloet mede drouch, ende den fiertere van sinte Donaes. Maer het gheliefde den almueghende god, dat Marie onse Princersse vp den seluen.xxvij.sten dach van Maerte.Anno.lxxxi.verschiet van deser weerelt omtrent der noene, waer omme dat men in thof vanden prinche, ende al die stede van Brugghe duere onsprekelicken rauwe bedrijuen sach. Ende men lietse bloot ligghen vp eene bedtstede twee daghen lanc, so datse elc die wilde mochte gaen sien. Ende thende den twee daghen wordt si ghebalsemt ende in een loodin vat gheleyt. Ende in alle dye prochye kercken van Brugghe luydemen vele hendeclocken. Ende bouen dien so cloptemen snuchtens, tsnoens, ende tsauents tot dat si begrauen was met rauweghen gheluyde.

[Den.xxviij.sten en den xxx.sten dach van Maerte]

¶ Item vp den.xxviij.sten dach van Maerte, so trocken dye ghedeputeirde van ghendt thuysewaert, ende deden der wet van ghendt Rapoort, vander handelinghe ende sprake die si ghehadt hadden metten Prinche ende met sijnen Raet.

¶ Item die princersse Marye van Bourgoengien overleden sijne, so was vp den xxx.sten dach van Maerte.Anno.lxxxi.vp den Palm auent ter hallen huyt een ghebodt ghedaen, dat die Prinche wilde ende beual dat alle dye Officiers souden blijuen in haerlieder officie naer dye houde costume, omme datmen recht ende iusticie onderhouden soude.

¶ Item vp den seluen.xxx.sten dach van Maerte, so ghinghen te houe byden prinche dese naeruolghende personen. Te wetene, mer Ian van Nieuwenhoue.f.Clays Willem mooreel, Ian van Ryebeke, metten anderen drye persoonen voorscreuen, ende al daer waren sy ontsleghen vanden Prinche, ende van sijnen Rade, ende ooc huer liederborghen, ende waren gheabsolueirt van alle voorleden saken die hem lieden aen gheleyt waren, byden procuruer generael, van Sprinchens weghe ende van rijnen Raede.