Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item corts daer naer die van Hutrecht]

Item corts daer naer die van Hutrecht, ende die met hem lieden ghealligiert waren, hadden wel ghewilt paeys hebben met den hertoge Maximiliaen, ende presenteirden een grote somme van penninghen voor haerlieder beteringhe, maer het en was den Bourgoengioenen nyet ghenouch, ende wilden dat die van Hutrecht meer gauen, ende aldus bleeft fluwerende als vanden paeys te makene. Ende binnen deser tijt so ghebuerde dat onse princersse seer cranc worde. Ende die van Hutrecht dat vernemende, si wilden doe selue reparacie hebben van haerlieder schade, ende sy en verschoten doe niet, ende aldus bleef doorloghe noch gheduerende.

[Den.ij.sten dach van Maerte]

¶ Item tsaterdaechs den.ij.sten dach van Maerte, soe vercochten die.vi.ghecommitteirde van Brugghe coorne in dye Reye te schepe, ende ooc mede ten huyse van Ian van den Leene, te wetene een libra groten thoet, ende die landtslieden brochten doe ooc lettel corens ter marct. Ende tsaterdaechs daer naer en was tcoorne niet ghestelt, ende die tarwe van den lantslieden galt.xviij.schellingen groten, ende tcoorne vanden cooplieden galt ooc.xviij.schellingen groten. Ende nochtans en was binnen meneghen tijden soe vele corens ter marckt niet ghesien vp eenen marcke dach, alst doe was. Ende es te wetene dat dese dierste vanden coorne gheduerde wel.iij.of.iiij.iaer, somtijts wat hoghere, ende somtijts wat neirdere, ende in sghelijcx wast grote dierte van alle maniere van grane, ende alle andere vitaelgie, twelcke noeytman en gheleifde, so langhe tijt gheduerende.

[Den.xviij.sten dach van Maerte.Anno.lxxxi]

¶ Item in tselue iaer vp den.xviij.sten dach van Maerte.Anno.lxxxi.vp eenen vrydach ontrent half vastene, die goede lieden van Ghendt ouermerckende dat die here van Gaesbeke hem altoos binnen Brugghe was houdende, contrarie den rechten ende preuilegien vander stede van Ghendt, so was hi noch anderwaruen verbannen huyten lande van Vlaendren vijftich iaer vp sijn hooft. Ende hy hem niet ghetroostende langher binnen der stede van Brugghe te blijuene, hi nam oorlof aen die princersse die welcke als doe te bedde lach seer cranc, ende hi track te dier tijt huyt den lande van Vlaendren.

[fol. CC.xxiiij.v]

¶ Ende in dye selue maent van Maerte, bi consente vanden prinche ende der princersse trocken te Ghendt die Bisschop van Mets, die here van Beuere, ende die heere vanden Gruythuyse. Ende was die cause dat die van Ghendt te Brugghe byden Prinche noch princersse niet commen en wilden, want die van Gendt waren qualic te vreden, omme die doot van mer ian van Dadyzeele, wijlen hoochbaliu van Ghendt, ende om meer andere pointen ende onghenouchten hem lieden ghedaen. Ende ooc so hadden si ghebannen Phelips van Heurne heere van Gazebeke.L.Iaer huyten lande van Vlaendren. Ende hi aldus ballinc sijnde, dye Prinche ghedoochde dat hy te Brugghe ghinc achter strate, twelc dye van Ghendt meynteneirden dattet was yeghens hare preuilegien. Aldus dese voornomde heeren spraken so met die van Ghendt, dat si so vele daden, datter eenege ghedeputeirde van Ghendt met hem lieden quamen te Brugghe byden prinche, sdaechs naer onser vrauwen dach, in Maerte, als die van Ghendt te houe quamen, so vonden si dye princersse sieck te bedde ligghende tot vp die doot, ende aldus so waren si vanden prinche ende vanden heeren goetlick ghetracteirt ende ghehoort in hare affeeren, ende hem lieden was gheconsenteirt, dat si souden onderhouden haerlieder preuilegien ende goet recht. Dies soe beloofden si daer den prinche te doene als goede ende ghetrauwe ondersaten schuldich sijn te doene.

¶ In desen tijt was dicwils processie generael ghedreghen te Brugge, om onsen here te biddene om paeys ende eendrachtichede, binnen den lande van Vlaendren.