Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item nv keeren wi weder ende moeten noch vermanen vander orloghe]

Item nv keeren wi] weder ende moeten noch vermanen vander orloghe, die noch gheduerde tusschen den bisschop van hutrecht ende dander partye,

onder welcke grote beroerte ende schermutsinghe dicwil gheschiede.

¶ Item ontrent vastenauent quam dye mare te Brugghe, dat dye Capiteyn ende tvolck van oorloghen vanden hertoghe Maximiliaen ende van den bisscop Dauid van Hutrecht hadden versleghen wel.ix.duysent mannen, ende ons volc hadde die victorie yeghens hemlieden, niet yegenstaende dat die van Hutrecht hebben in ghenomen nyeuwe saudenieren, ende hebben ghenomen tot haren Regente een machtich man, die welcke was broeder van den nyeuwen hertoghe van Cleuen, daer si groot hooft aen maecten, ende si en verschoten niet.

¶ Item die Bisschop Dauid dye hilt hem la in een stedekin ghenaemt Wijc, met petijt salasaert, ende andere personen van orloghen. Ende aldus reden si huyt ende inne, orloge houdende vp dye stede van Hutrecht, metsgaders den Hollanders, die al betalen moesten maer si hadden lieuer paeys ghehadt.

¶ Item in dien tijt alle die renten die dye van Hutrecht, ende alle die met hem lieden alligierden in Hollant hadden, die waren alle ghearresteirt van sprinchens weghe, ende alle die bladinghe die daer of quam, was gheimployeert, omme tvolc van orloghe mede te betalene, daer mede datmen yeghens hemlieden orloghe hilt huyter name vanden hertoge Maximiliaen.