Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Dits die huytuaert vander edelder Princersse, vrauwe Marie van Bourgoengien, eeneghe dochtere van den Hertoghe Kaerle van Bourgoengien.

ITem des anderdaechs vp den scortelclocke woensdach, ghinc dye prinche ter kercke van onser Vrauwen, met state als sdaechs te voren, ende naer die houelinghen volchden hem die Wet vander stede van Brugghe, ende inden choor stont ghemaect een huysekin, daer vp dat stonden grote menichte van barnende keersen. Ende den Choor was al behanghen met swarten lakene, ende bouen onder die reeze een swart fluweelen laken rontomme vp tander lakene, ende al besaeyt rontomme metter wapene vanden Prinche ende vander Princersse, ende dye reezen waren rontsomme dye kercke al vul wassen keersen barnende. Ende een Bisschop dede tofficie vander messe, ende dye sanghers van sprinchens cappelle die songhen dye messe, die welcke officie was seer eerlick ghedaen, maer was compasselick om sien.

[fol. CC.xxv.v]

[Int Iaer M.cccc^c.ende.lxxxi.vp den derden dach van April]

¶ Item alle die schamele Raulieden stonden in die voorkercke aen beeden sijden, elck met huerlieder toortsen in die hant, verwapent metten wapenen als voren, ghelijc si sdaechs te voren met den lijcke ghinghen, ende daer stonden sy also verslooft tot dat den dienst ghedaen was. Ende die voorseyde princersse was begrauen voor den hooghen outaer, in een schoon graf al nieuwe daer toe ghemaect ende gheuauteirt, ende binnen verchiert met schoone schilderye, ouer welcke sepulture eene schoone costelicke tombe nader hant ghemaect wort, als vp den dach van heden noch blijcken mach. Ende dit was int Iaer M.cccc^c.ende.lxxxi.vp den derden dach van April. Ende het cleet datmen vp tlijck leyde, alsmense ter eerden drouch, dat leydemen tallen hooghetijden vp die voorseyde tombe, ende om dagelicx daer vp te legghene was ghemaect een cleet van swarten lakene met eene cruyce van witten sattijne.

¶ Item inden seluen tijt waren onsprekelicke menichte van aerme lieden vergadert in sint Ians huys, daer elc mensche cleen ende groot ghegheuen was eenen grooten ouer dye siele vander princersse voornomt, alsoot blijct in die Incarnacioen.Anno.M.iiij^c.ende.lxxxi

Dese edele moeder vul crachteger weerde
Was den derden, april ghebrocht ter eerde

¶ Item bi welcker doot die officiers vanden houe al meest verlaten waren, ende dye Cancelier dede sijnen seghele anitseleren ende breken, ende hi vertrack met groten rauwe Tantwerpen waert te sijnen wijue.