Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xiiii.sten dach van Septembre]

Item vp den.xiiii.sten dach van Septembre, so quam mijn here van Gazebeke met vele heeren van sprinchens oordene ende met een Aduocaet in die camere van Brugghe, ende gaf daer der wet te kennene by den Aduocaet ende Notaris, hoe dat hy hadde gheappelleirt vanden banne yeghens die van Ghendt, voor onsen edelen prinche Maximiliaen, ende sijnen Raet, ende badt dye wet vander stede van Brugghe, dat si dat in ghedijnckenesse wilden houden, dat hi dat also ghedaen heift byden wille vander Princersse.

[fol. CC.xxij.v]

[Vp sinte Nicasis dach]

Item vp sinte Nicasis dach nae die noene, so was Willem moreel huyten steene gheleedt, met een ghedeel Artchiers van sprinchens weghe, ende was byden Balyu van Brugghe, ende men leedene duer die Proostye van sinte Donaes, ende also ter speypoorte huyt naer den Damme, ende van daer ter sluys, ende was in tcasteel beuolen yeghens den prinche te sijnen versoucke.

¶ Item mer Ian van nieuwenhoue.f.Clays, vp sinte Thomaes dach voor midwinter so was hem beuolen van sprinchens weghe byden Cancelier ende grooten raet ghewesen, dat hi soude blijuen in sijn huys, vp die verbuerte van duysent croonen, ende daer in te blijuene als voor vanghenesse, totter tijt ende wijle datter breeder vp voorsien waren.

¶ Item Ian de boot bleef ooc in sijn huys maer niet beuolen, ende Ian de Keyt hilt hem huyt der stede van Brugge, alsoomen seyde.

[Vp sint Thomaes dach]

¶ Item vp sint Thomaes dach den laetsten dach vanden Kersdaghen, so was in mijns heeren Raet dye Procureur generael, dye welcke aldaer heesch aen leyde van sprinchens weghe, dese.iij.personen, mer Ian van Nyeuwenhoue.f.Clays, Willem moreel, ende Ian van Ryebeke, den welcken heesch was dese. Dat si alle drie conspireirden ende hem lieden hadden gheuoucht met die van Ghendt, ende alianchie met hem lieden ghemaect teghens den wille vanden Prinche ende sijn consent, om hem eenen staet te makene naer haerlieder apetijt. Te weten dat si inden ontfanc vanden maentghelde dat den prinche te gheuene te sijnen ghebruyckene, hem qualic gequijt hadden ende ghemessuseirt.

¶ Item hoe dat mer Ian van Nyeuwenhoue.f.Clays tghelt vander stede van Brugghe ontfaen hadde om den Prinche te beuechtene, daer hi lach te Vyeuyle, ende oock omme tvolck mede te betalene, int iaer van lxxix.daer hi seyde, het was al verloren ende ghenomen vanden fransoysen, vp twelcke hem die Procuruer generael aensecht die contrarie.

¶ Item die procuruer generael leyde Willem moreel oock aen ende Ian van Riebeke, dat hem Ian Barbasaen hadde helpen beswaren dat hi onthooft was, ende voor dese methusen soe hiesch dye Prinche dese drie personen elck.xl.duysent leeuwen. Ende es waer dat dye Procuruer generael van ons Princhens weghe dese drie voorghenomde persoonen euen ghelijck beswaerde als van twee pointen. Teene was dat si alianchie maecten met die van Ghendt sonder consent vanden prinche. Dat tweeste point es te vseirene ende te heesschene het maent ghelt die personen te Brugghe wonende, alsoo wel vreimde als poorters Ende es te verstane dat dese drie pointen waren inghestelt bi quade informacie, ende dat partyelicke alsoomen noch hier naer wel hooren ende verstaen sal.