Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item het es waer dat die Prinche ende sijnen Raet vergadert waren]

[Vp den.xviij.sten dach van Lauwe en vp den.xxviij.sten dach van Lauwe vp eenen sondach]

Item het es waer dat die Prinche ende sijnen Raet vergadert waren, ten diueerschen stonden vp dye artijckelen voorseyde vanden voornomde drie personen. Ende alle saken wel ghehoort hebbende, hebben gheconcludeirt vp den.xviij.sten dach van Lauwe, ende was ghegheuen een apointement den.iij.personen voornomt Te wetene mer Ian van Nyeuwenhoue.f.Michiels, Willem moreel, ende Ian van Ryebeke, dat si gaen mochten waer si wilden, midts sekere doende ende borghe stellende elc voor die somme van duysentich pont groten. Ende hem lieden was gheseyt, waert datmense hier naermaels ter cause van dese saken voorseyde, weder dachuaerde inden groten Raet, ende voor den prinche te commene, ende in dyen si van dien in ghebreke waren, te compareirene, so soude elck verbueren teghens den prinche duysentich pont grooten, ende bouen dien so souden si ghecondempneirt sijn inden heesch voren verhaelt.

¶ Item vp den.xxviij.sten dach van Lauwe vp eenen sondach, so ghinghen te Brugge int hof vanden Prinche, met vrienden ende met maghen dese naeruolgende personen

Eerst mer Ian van Nyeuwenhoue.f.clays

Maertin Lem

Willem moreel

Ian van Ryebeke

Ian de Keyt

Ende Ian de boot.

¶ Item vp den seluen dach waren ooc int

[fol. CC.xxiij.r]

hof vanden prinche contrarie partyen vanden persoonen voorseyde, ende waren dese.

Mer Roelant van Haelwijn Baliu

Mer Anthonis vander Vicht Scouteeten

Mer Iacob van Ghistele Burchmeestere

mer kaerle van huytkercke burchmeester

Ende mijn here Ioos van Vassenare, ende noch andere houelinghen. die welcke.vi.personen als bouen, quamen byden prinche, hemlieden excuserende van tghene datmen hem lieden hadde aen gheseyt, ende seyden haerlieder partye was hem lieden te machtich ende te muegende, maer baden den prinche dat sy mochten gehoort sijn in iusticien, het en soude niet bevonden sijn dat si mesdadich waren in tghene datmen hem lieden daer aen gheseyt hadde, also men noch hooren sal.

[Den laetsten dach van Lauwe. Anno lxxxi]

¶ Item vp den laetsten dach van Lauwe. Anno lxxxi.soe hadde Willem moreel wettelick dach inde Cancelrye, omme te horen wat mijn heren in mijns heren Raet hem heeschende waren. Ende daer waren ooc mer Ian van Nieuwenhoue.F.Clays, Martin Lem, Ian van Ryebeke, Ian de keyt, ende Ian de boot, alle personen die belast waren ende ghenoteirt, als mesdaen hebbende yeghens den Prinche. Ende alle dese.vi.personen voorseyde, begheerden eene cortijnghe te hebbene, ende wilden betuyghen dat si nyet en hadden mesdaen. Ende aldus so begheerden si ontsleghen te sijne, ende die saken waren huyt gestelt totten eersten daghe van April.Anno.lxxxi.

¶ Item vp den seluen tijt so'begheerde dye prinche die selue ceuencie die hertoge Karel plochte te ghebruyckene, ende tot dien noch.xl^m.croonen, ende die princersse.x^m.penninghen, van.xl.groten tstic, ende dit vanden lande van Vlaendren. Ende dye Prinche ontboot te Brugge dat die drie leden, ende al dat onder hem lieden behoorde, dat si hem dit consenteren souden, want die prinche ende die princersse waren doe beede te Brugghe. Ende es waer dat die van Ghendt ter dachuaert niet commen en wilden, maer haerlieder smalle steden die quamen, maer si en wilden nyet varder consenteren dan haerlieder hooft. Te wetene dat die van ghendt, consenteren souden Ende die van Ypre en consenterident ooc niet, ne maer dye van Brugghe ende dat onder hem lieden behoorde, metsgaders tvrye, si consenteirden haerlieder transpoort. Aldus soe ghinckt toe daer men mede besich hadde gheweist van Lauwe tot den.xxij.sten daghe van Sporcle.Anno.M.iiij^c.ende.lxxxi.

¶ Item dye van Ipre ende al dat onder hem lieden behoort, si waren nader hant gheaduerteirt, ende si hebben ooc mede gheconsenteirt met die van Brugghe ende die vanden Vryen. Maer die begheerde van Maximiliaen en ghinc niet voort, want die van ghendt hadden al hare smalle steden so gheinformeirt in tijden voorleden, dat si nyet consenteren en souden voor dat Ghendt haerlieder hooft gheconsenteirt soude hebben, ende anders niet.

[Anno.lxxxi vp den.xij.sten dach van Decembre]

¶ Item weit dat mijn here van Gasebeke, die welcke te ghendt ghebannen was.L.iaer huyten lande van Vlaendren.Anno.lxxxi vp den.xij.sten dach van Decembre voor den vastenauent, vercreech byden hooghen Raet vanden prinche Maximiliaen vanden Cancelier een mandement, het welcke hy sandt by eenen duerwaerdere binnen der stede van Denremonde, twelcke daer ghelesen was. Dat die stede van Ghendt vp een groote boete te verbuerene yeghens den prinche tot eenen voornomden daghe souden seynden hare ghedeputeirde byden prinche, ende dat die den prinche souden betooghen haerlieder preuilegien, hoe si die moghentheyt hebben dat si den here van Gazebeke oft eeneghe andere edele van mijns heren Rade, moghen bannen huyten lande van Vlaendren. Ende desen dach was gheseyt te houdene den.xiij.sten dach van Maerte in die stede van Aelst, maer die van Ghendt en quamer niet.