Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Vp Sinte Nicasis dach naer dye noene in Decembre]

Vp Sinte Nicasis dach naer dye noene in Decembre, so quam te Brugghe dye hertoghe Maximiliaen van Bruessele, ende hem volchden in sijn incommen vele heeren vanden Toysoene. Ende hem volchde mer Pieter lanchals, ende ooc Maertin Lem. Ende men seyde hadde Maertin Lem vreese ghehadt van gheuanghen te sijne, hy en hadde metten Prinche nyet in ghecommen. Maer si seyden dat hi den Prinche borghe ghestelt hadde voor lijf ende goet, omme te verantwoorden te commene, ende die Prinche, ende die princersse ende die Duwagiereghe waren alle dyen wintere meest te Brugghe. Ende binnen der stede van Brugghe was grote vergaderijnghe van volcke van diueersche steden, maer die van Ghendt en quamen niet vp dien tijt.