Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Item vp den.xxvij.sten dach van Nouembre, so quam die prinche te Brugghe met schoonen state.

Ende in den Aduent voor midwintere, so swoer mijn here Iacob van Haelwijn hoochbaliu van Ghendt in die stede van mer Ian van Dadyzeele, die binnen der stadt van Antwerpen so deerlic versleghen was, als ghy hier voren ghehoort hebt.

[x.sten dach van Decembre. Anno.lxxxi]

¶ Item vp den.x.sten dach van Decembre. Anno.lxxxi.so was te Brugghe int Ghijselhuys gheuangen Willem Moreel, commende huyter camere van Brugghe, ende dat byden Baliu mer Roelant van Haelwijn bi virtute van mandemente, twelc hy hadde van bouen also hi seyde. Ende dat also ghedaen sijnde, naer der noene so vinck die voorseyde Baliu Ian van Ryebeke, in dye Proostye van sinte Donaes, daer hi stont byden officiers vanden prooschen, om wet te doene als Redenaer vanden prooschen. Aldus Willem Moreel ende Ian van Ryebeke moesten beede vp den steen gaen, ende daer gheuanghen blijuen, elck alleene, ende daer en mochte nyement tot hem lieden gaen, noch yeghens hem lieden spreken binnen drie daghen. Ende sommeghe andere die in wetten met hem lieden gheweist hadden, dye hilden hem lieden bedect. Te wetene mer Ian van Nyeuwenhoue.F.Clays, Ian de Keyt, Ian de Boot, Maertin Lem, ende meer andere.

[Den.xi.sten dach van Decembre]

¶ Item vp den.xi.sten dach van Decembre so was te Ghendt ghebannen Phelips van Huerne, here van Gazebeke vijftich iaer huyten lande van Vlaendren, omme dat hy wilde die stede van ghendt vermaken yeghens den prinche Maximiliaen, ende was huyt omme te makene discoort tusschen Ghendt ende der stede van Brugghe, ende seyde confusie vander stede van Ghendt Niet yeghenstaende dat hi te ghendt ghebannen was, hi hilt hem te Brugghe byder Princersse.