Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item die voocht van Belle, die contrarie onsen prince was voor Venloo]

Item die voocht van Belle, die contrarie onsen prince was voor Venloo, die es nv met ons lieden, ende es nv byden bisschop Dauid in tcasteel van Wijc. Ende al tlant van Luycke, ende al tlant van Brabant waren vp desen tijt alle eendrachtich ghesworen met onsen prinche den Hertoghe Maximiliaen. Ende onse voorseyde Prinche quam corts daer naer te Antwerpen, in die maendt van Ougst. Anno.lxxxi.

[Den derden dach van Octobre. Anno.lxxxi]

¶ Item vp den derden dach van Octobre. Anno.lxxxi. Doe was teerste dat dye water muelenen te Brugghe eerst moelen, sauents ten.vij.hueren, ende doe en was noch maer die eene vulmaect.

¶ Item vp den seluen tijt so waren ter zee gheuanghen vele harijnc busen huyt vlaendren vanden fransoysen, maer die Coninc deidse ontslaen ter causen vanden bestande als voren, ende men lietse thuys trecken sonder rentsoen te gheuene. Niet yeghen staende in die maent van October quam die mare te Brugge, haddet god niet voor sien Sint Omaers hadde gheleuert gheweist den fransoysen bi eeneghe diet ghemaeckt hadden metten heere van Crieuecuer, ende grote communicatie tsamen al heymelick ghehouden hadden, van welcke verraders binnen der stede van sint Omaers, sommeghe waren onthooft, ende sommeghe vloon huyter stede, ende noch eeneghe bleuer gheuanghen. Ende dusdaneghe dinghen gheschieden ter diueersche tijt binnen der voorseyde stede van sint Omaers.

[Den.vij.sten dach van Octobre]

¶ Item vp den.vij.sten dach van Octobre vp eenen Sondach auent naer dye maeltijt, als mer Ian van Dadyseele thuysewaert gaen soude vander plaetse daer hi sauents gheten hadde, binnen der stadt van Antwerpen was belaecht van.v.ghesellen, dye welcke hem so grieuelicken quetsten ende wonden, als dat hi over doot vander voorseyde quetsuere te bede lach, twelc te beclaghene was. Want hy den Prinche ende den lande van Vlaendren wel ende ghetrauwelick ghedient hadde in diueerschen stonden, ende was een vroom capiteyn, allomme die eerste, ende niet die laetste. Ende es waer dat onse prinche als doe te Antwerpen sijnde, dede ghebieden by een van sijnen Heraulten datmen dese voorseyde.v.personen niet huysen noch houen en soude, vp al dat si vanden prinche hielden, ende wiese te voorschijne brochte of te kennen'gaue waer si waren, men soude hem gheuen duysentich croonen voor sijnen loon. Ende die Prinche dede die poorten sluyten vander stede, omme datmense te bedt soude moghen vinden. Ende die prinche quam selue in persoone Ian van Dadyseele visenteren, ende begheerde van hem te wetene wie si waren die hem aldus ghewont hadden hi wilder prouisie vp hebben.

[Den.x.sten dach van Octobre]

¶ Item so heift dit faeyt hem aen ghetrocken dye heere van Montengy, alsoomen seyde, Segghende dat mer Ian van Dadyseele hem in tijden voorleden vele, te cort ghedaen hadde, inden tijden dat hi was hoochbaliu van Ghent. Ende es waer dat hi verschiet van deser werelt vp den.x.sten dach van Octobre, vander voorseyde quetsuere Tantwerpen binnen der stede als voorseyde es. Ende dye mare ghinc daer datter int lant noch leuende waren, die men wel soude vinden in toecommende tijden. Dus elc sye voor hem seluen.

¶ Item in desen seluen tijt was te Ghendt inder stede grote beroert onder tvolck, ter cause vanden broeders vanden Iacoppijnen, ende dat omme dat eeneghe vanden broeders ghepreict hadden achter dye stede saken van heresyen ende ongheloouicheden in vele diueerschen pointen.

      ¶ Nota.

[Den.xxv.sten dach en xxi.sten dach van Octobre]

¶ Waer omme dat die wet van Ghendt dede een openbaer ghebodt doen met eenen trompette al die stede duere, vp den.xxv.sten dach van Octobre. Anno.lxxxi.verbiedende alle haghe poorters ende inghesetene, dat nyemant metten Iacopijnen van Ghendt conuersacie hebben en soude, noch messe daer gaen hooren, noch sermonen, noch ander godlicke diensten, ende dat vp een grote boete van penninghen.

[fol. CC.xxij.r]

¶ Item in dese selue maent so was die stede van Brugghe seere verlast van aerme lieden, dye daer gheulucht waren ende ghecommen van Westwaert, also dat vp den xxi.sten dach van Octobre waren.vij.aerme lieden doot ghedronghen onder lieden ende kinderen, daermen elcken aermen mensch eenen twaeluaert deelde, over dye siele van Clays van Nyeuwenhoue, die als doe ouerleden was.

[Den.xxvij.sten dach van Nouembre]

¶ Item vp den.xxvij.sten dach van Nouembre was te Brugge een ghebodt ghedaen dat so wie eenich coorn te Brugge te coope brochte van ouer zee ende van ouer sandt, men soude hem gheuen.v.libra groote voor sijnen drincpenninck van elc hondert hoet, vander stede van Brugghe, ende dat soude ghedueren tot Paesschen toe naestcommende.