Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Hoe dye Hertoghe Maximiliaen met een groot volc tract voor die stede van Venloo]

Hoe dye Hertoghe Maximiliaen met een groot volc tract voor die stede van Venloo, ende hoe hijse met machte van tgrote bestormen ende assaulte daer vp doende, tsijnen wille creech ende wan.

[fol. CC.xxi.r]

ITem ontrent Sint Iansmesse reedt hertoghe Maximiliaen te Ceulen tot eender brulocht, ende quam van Cuelen in tlant van Gheldre, ende sijn volc lach voor een stedeken gheheeten Venloo, in welc stedekin waren die personen die hemlieden ghehouden hadden contrarie ende partye van onsen gheduchten heere, houcx sijnde, die welcke persoonen hi hebben wilde te sijnen wille. Ende al tlant van Gheldre was hem onderdaen, sonder dat voorseyde stedekin van Venloo. Maer die hertoghe Maximiliaen heift dat stedekin seer bestormt met assaulte ende andersins, soe dat si hem vp gauen ende quamen ter ghenade. Ende eenege vanden houcx die vloon huyter stede, ghelijck als die heere van Monfoort ende sijne compaengie met, grooter menichte.

¶ Item in die maent van Ougst quam die here van Montfoort, die welcke was vander partye vanden houcx, in die stede van Hutrecht met crachte, midts dat hi te vriende hadde den Burchmeestere vander stede, ende hi hielt hem op een sterc slot, twelcke staet in den middele vander stede. Ende die voorseyde Burchmeestere dye dede den voorseyde heere van Montfoort hebben engienen, ende andere instrumenten van orloghen. Byden welcken hi hem daer vp hilt yeghens elcken die hem deeren wilden of van daer verdrijuen. Ende die heere van Montfoort midts den gheenen die hi themwaert hadde, verdreef den Bisschop van Hutrecht ende sijn volc huyter stede, ende aldus soe moeste hem die bisschop Dauid houden vp tcasteel te Wijc met sijnen volcke. Ende aldus rees daer een felle orloghe vppe, want die Gheldersche, ende die Hollanders, ende Petijt salasaert, ende andere heren die quamen den Bisschop te baten. Ende een ghedeel ioncheeren van Hutrecht trocken spelen naer

[fol. CC.xxi.v]

Amelsvoorde, ende si worden alle gheuanghen van Petijt salasaert, ende andere capiteynen, Ende onder Amelsvoorders ende andere van Hutrecht, bleuer wel.iij^c.personen versleghen vp sinte Morissis dach.