Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Voort so es te wetene dat vp den.xx.sten dach van Meye.

Anno lxxxi.so was in die voorseyde stadt van Tshertoghenbossche Ruddere ghesleghen hertoge Phelips van Bourgoengien, sone vanden edelen Hertoge Maximiliaen, ontrent.iij.iaer oudt sijnde, ende dye oordene vanden gulden Toysoene was hem aen ghehanghen. Ende als dit ionghe kint den Rudder slach ghegheuen was, soe tract sijn sweert ooc huyte als een dye hem weeren wilde. Dies verblijde hem dye vadere, dat hy sach dat tkint sulcke coraedgie in hadde, hopende dattet noch een Prinche van vromichede worden soude. Ende mijn here van Antoengien was die hem die oordene aen sijnen hals hinck.

¶ Item in desen tijt was in dye stede van shertoghenbossche ghemaect een stallaedgie seer rijckelic verchiert, met schonen tapijtserye ende met gulden lakene, daer dye Prinche ende die princersse beede vp waren met vele edelen, vp welcke staedgie hy die voorseyde stad besworen hadde. Ende eer die prinche ende die Princersse vander voornomder staedgie quamen, soe brack die voornomde staedgie, daer dye vander stede seere in beschaemt waren ende beladen, maer die prinche noch dye princersse, noch den ionghen prinche en waren niet ghequetst gode lof, maer daer waren eenege vander princerssen ioncfrauwen die claechden dat si hem seer ghedaen hadden.

[Den.viij.sten dach van Wedemant.Anno.lxxxi en den.xxviij.sten dach van Wedemaent]

¶ Item vp den.viij.sten dach van Wedemant.Anno.lxxxi.ende al dye maent duere was grote beroerte om tcoorne al Vlaendren duere, want die tarwe galt.xvi.schellingen groten thoet, of daer ontrent. Ende vp den.xxviij.sten dach van Wedemaent, ende was saterdach doe was te Brugghe gheboden dat die stede souden doen vercoopen coorne, ende gheuen om.xi.schellingen ende iiij.der groten thoet, ende vrye caliote, maer elc persoon en mochts maer hebben twee hoet ten meesten. Ende tsanderdaechs so stelde die Burchmeester Maertin Lem metten schadebeletters, het coorne vanden lantslieden vp eenen prijs, want si waren so orghelgiues ende quaet van sprekene, ende en wisten nyet hoe diere si coorne louen wilden, maer het beste was ghestelt vp.xi.schellingen groten, ende tander vp.x.schellingen groten, ende die rugghe in aduenante, ende also bleeft staende een poose tijts.