Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item in tselue iaer die Duwagiereghe hertoghe Karels wedewe die track ouer in Inghelant]

[Den laetsten dach van Septembre. Anno.lxxx]

Item in tselue iaer die Duwagiereghe hertoghe Karels wedewe die track ouer in Inghelant, tot den coninck haren broedere, om bystant te doende den steden, daer sy hare Duwarye vp hadde, dies si daer eerlicken ontfaen was ende track darwaert met schonen state. Ende weder keerende huyt Inghelant, so quam si te Brugghe vp den laetsten dach van Septembre. Anno.lxxx.ende was vp eenen Saterdach auent. Ende die coninc sandt sijnder suster.xxiiij^c. Inghelschen die den hertoghe Maximiliaen te hulpe quamen.

[Den.ij.sten dach van Octobre]

¶ Item die voorseyde vrau Margriete reysde van Brugghe te Ghendt waert den.ij.sten dach van Octobre, maer sy en openbaerde te Brugghe al tlast niet, dat si vanden Coninc Edewaert haren broeder hadde, voor dat sijt selue den hertoghe van Oostenrijcke gheopenbaert hadde alle saken.

¶ Inden seluen tijt die visschers van Vlaendren reeden weder toe te harijnghe te varene, ende oock die Hollanders ende Zeelanders, ende si vijnghen redelicken wel, gode lof, maer die neeringe bleef sobere, midts dat die cooplieden huyt vranckerijcke hier nyet commen en mochten, noch ons volc daer reysen. Ende in dyt iaer van.lxxx.wast eenen natten couden somere.

¶ Item in desen tijt was een poortere van Ghendt, dye welcke ghebannen was te Ghendt om sijne meshusen huyten lande van Vlaendren, die welcke vercreech subtijlick sijn inlandt, ende hi onthilt hem binnen der stede van Brugghe. Dies veruolchden die schepenen van Gendt vp den voorseyde, ende waren huyt om hem te vanghene, ende te onthoofdene, naer die rechten ende preuilegien vander stede van Ghendt. Maer hi ghecreech sulcke vrienden byden Hertoghe Maximiliaen ende byder Princersse Marie, dat si hem verbaden sijn leuen. By welcken hem die schepenen corrigierden met diueerschen amenden. Te wetene dat een metalen hooft was ghestelt voor Tschepen huys van Ghendt, ghestoffeirt met varwen, al varsch onthooft schijnende, ende daer stont ghescreuen in goten letteren die naeruolghende.

[Den vijfthiensten dach in Hoymaent.Anno.M.iiij^c.ende.lxxx]

¶ Dit es een vanden Amenden die een doen moeste, omme dat hi ballinc sijnde, vander stede van Ghendt hem veruoordert heift, vp seker inlandt by hem vercreghen te commene, binnen der stede van Brugghe, sonder consent van Schepenen vander kuere in ghendt, aldus gestelt den vijfthiensten dach in Hoymaent.Anno.M.iiij^c.ende.lxxx.

¶ Item noch so was in Schepene camere vander kuere, ende in die Schepen camere vander kuere, ende in die Schepen camere van ghedeele dit naeruolghende dicht ghestelt, elck oock met eenen metalen hoofde ghestoffeirt als bouen.

Notable personen van hoogher namen
Gheauctorizeirt om tvermaken der wet
Committeirt discretelic naer tbetamen
Persoonen van eeren huyt elck let
Om tpreuilegie suuer ende net
Tonderhoudene, en sprinchens eerlichede
Ouerdijnct alle saken hoe ende bet
Hem alle dijnc voucht in eendrachtichede
Speghelt nv hier in so hebdy vrede

Anno.M.CCCC.ende.lxxx

¶ Item achteruolghende den couden somere, so volchde daer naer also stranghe eenen coude wintere, beghinnende voor Kersdach, ende gheduerende wel.x.weken lanc, vele snee vallende, ende vele kijnderen ende ooc houde lieden hadden verurosen hielen. Oock mede wast een sticke tijts wijndeloos, want die wijntmuelens en mochten niet malen, ende dye watermuelens waren verurosen vanden yse. Aldus hadden te Brugghe vele aerme lieden ghebreck van broode, maer onse heere versaecht, alst blijct in dit Incarnacioen.

Lancstranc vorst dieren tijt coude snee
Dede den menschen bedriuen wee

[Den derden dach van en die dagheraet vp sinte Sebastiaens dach Lauwe.Anno.lxxx]

¶ Item vp den derden dach van Lauwe.Anno.lxxx.metten nyeuwen iare waren eeneghe persoonen binnen der stede van sint Omaers, die onder den Capiteyn Salasaert waren, ende waren huyte omme die stede

[fol. CC.xx.r]

van sint Omaers ouer te gheuene inden handen vanden fransoysen, vanden welcken eeneghe waren onthooft binnen der voorseyde stede.

¶ Item in dyt voorseyde iaer was noch grote wentellijnghe in Holland van diueersche steden, omme dye partye wille vanden Houcx ende den Cabeliaus. Ende die houcx wonnen die stede van Leyen, stelende ouer thijs bi nachte, ende beclommen die mueren in die dagheraet vp sinte Sebastiaens dach. Haer lieder capiteyn hiet heer Reynier van bouchuze, ende hy vinck binnen Leyen die here van Egmont ende die heere van Wassenare, dye noch beede te bedde laghen.

¶ Item corts daer naer wort dye stede van Leyen weder ghewonnen van mer Ian van berghen ende vanden Marcgraue van Antwerpen, huyter name vanden Hertoge Maximiliaen.

[Den laetste dach van Maerte.Anno.lxxx]

¶ Item die Prinche track van Ghendt te Leyen, ende daer verbeyde hem den Raet van Brabant om met hem te sprekene. Ende den laetste dach van Maerte.Anno.lxxx.was te Brugghe een ghebodt ghedaen van drie daghen bestant, tusschen die fransoysen ende den vlaminghen.