Dit gheschiede binnen den iare.lxxxl.
[Den.vi.sten dach van April]
ITem dye stede van Dordrecht die doe was vanden Houcx partye, wart subtijlicke ghewonnen met verdecten schepen, dye onder al vul ghewapender lieden waren, ende dat dede mijn here van Egmont, huyter name vanden Prinche Maximiliaen. Ende dye Burchmeester van Dordrecht slouch met een valckebeck naer den here van Egmont om hem doot te slane, haddy gheconnen. Dies track dye here van Egmont sijn sweert huyte, ende slough den Burchmeestere den hels ontwee, ende noch een man wasser doot ghesleghen. Ende alle man sloot sijn huys, ende binnen der seluer achternoene baden sy alle ghenade, ende elc van hem lieden moeste een hooftcleet of een dwaelkin aen haren harijnck binden, in teekene dat si alle cabeliauwen worden waren. Ende dyt gheuiel vp den.vi.sten dach van April naer paesschen. Anno.M.CCCC.ende.lxxxi.
¶ Ende die stede vanden graue was ooc versubtijlt midts den Casteele, huyter name vanden Prinche voorseyde.
¶ Ontrent desen tijt waren te Brugge ghebannen met eender duergaende waerhede xl.personen. Te wetene.xxviij.mannen, ende xij.vrauwen, waer of die.v.mannen ghebannen waren contrarie haren prinche, ende tweluaren vander stede van Brugge, elc.L.iaer, ende andere waren ghebannen elc naer sijne meshusen of mesdaet.
¶ Item in desen seluen somere begonstmen eerst te singhene tsinte Donaes onse vrauwen lof alle auende, ghelijcment noch daghelicx continueirt, ende men beyaert in tgheluyt eerment gaet doen, ende ghedaen sijnde, so slaet men die bedeclocke. Ende sichtent dier tijt eest voort en voort ghecommen, datment nv doet in alle die prochye kercken binnen Brugge. Ter eeren van gode moetet sijn, ende sijnder ghebenedyder moeder Maria Amen.
Auteursrechtvrij