Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[¶ Item in die selue maent ons prinche ende princersse waren te Namen]

¶ Item in die selue maent ons prinche ende princersse waren te Namen, ende hi hadde daer ontrent een ghedeel volcx van wapenen, die welcke vele sloten ende casteelen omme wierpen, die toe behoorden Willem van Harenburch, ende andere die onsen Prinche toebehoorden, maer hilden alianchie metter franscher sijde. Ende die aldus ghecastijt hebbende, ons prinche was van wille omme te treckene naer Lutcenburch, om aldaer ghehult te sijne van dyer contreye. Ende die Prinche wort so beraden dat hy daer niet en trac, maer quam naer Ghendt, ende doe was ghemaect een bestant tusschen den coninck ende onsen Prinche, drie maenden lanc gheduerende.

[Den.xxviij.sten dach van Ougst]

¶ Item vp den.xxviij.sten dach van Ougst waren te Brugghe ghebannen.xxxv.personen, waer of datter.iiij.ghebannen waren, contrarie den prinche ende tweluaren vander stede van Brugghe. Eerst twee temmerlieden, een saelmakere, met noch een van brugghe. Binnen dese iare was die watermuelen te Brugghe vulmaect. Ende binnen desen

[fol. CC.xix.v]

seluen iare gaf tvolc te Brugghe te diueerscher tijt maentghelt, omme die saudeniers ende dye orloghe mede te onderhoudene, ende sommels gauen sy dobbel Maentghelt. Twelcke tvolc seere tachter maecte in dyen tijden, ende warer seere mede belast.