Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Item vp den.xxij.sten dach in Meye, te wijle dat die prinche hilt sijne hoochtijt van Sinxene in Hollandt.

Anno.lxxx.doe quamen die fransoysen om Lutcenburch te ghecrijghene, maer die hertoghe Maximiliaen trac vromelic yegens hem lieden. Ooc so quamen eeneghe andere fransoysen ontrent Cassele, omme daer in te brekene ende te commene in Vlaendren, maer mijn heere die graue van Rommont weder stontse daer fijnlic, ende dreuense van daer, soe dat si weder eerselen moesten.

[Den.xij.sten dach van Wedemaent Anno.lxxx]

¶ Item vp den.xij.sten dach van Wedemaent Anno.lxxx.vp eenen maendach, ten thien hueren inden auent quam die prinche huyt Hollant binnen der stede van Antwerpen, ende track des anderdaechs naer Bruessele, bi sijn gheselnede, ende daer stonden die heren van Brabant by hem ende daden vergaderen vele volcx, dat sy daden ghereeden ter orloghe terstont.

[Den derden dach van Hoymaent]

¶ Item vp den derden dach van Hoymaent, die fransoysen sijnde ontrent Lutcenburch, ende ons Prinche sijnde met een ghedeel Brabanders vp die palen vanden lande, ontrent Namen, so wasser ghemaect.iij.weken bestants, om te sprekene van paeyse, of om beter bestant te makene.

¶ Item in welcke maent ons prinche ende princersse wel naer verraden souden hebben gheweist, by een heere van Luycke, ghenaemt Willem van Harrenburch, die welcke hem hilt metten franschen Coninc. Ons prinche dit vernemende, trac met haesten te Bruessel waert, maer dye Brabanders en keerden niet mede weder.

¶ Item in die maent van Ougst daer naer so waren die Fransoysen met tenten ende met pauwelioenen, ende met vele artijlgerye dienende ter orloghe, ende waren neder ghesleghen te velde, byden parcke daer si tiaer te voren hadden gheleghen, ende reden daer of en aen ontrent der stede van Aryen, ende ooc eldere ontrent onse palen van Vlaendren. Ende die mare ghinc dat die Capiteyn van Aryen met eeneghe personen ghetrocken was aen die fransche sijde.

¶ Item in desen tijt mer Ian van Dadyseele, ende meer ander Rudders, hadden omme die palen vanden lande te bewarene vergadert wel.ix.duysent volcx. Te wetene huyter casselrye van Ghendt, Brugghe, ende Ypre, maer terstont so trac ons volck al thuyse waert, ende seyden dat dye fransoysen waren vertrocken, ende achterwaert ghedeyst van onsen palen van Vlaendren.