Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item in desen seluen tijt waren die vier landen vergadert Tantwerpen seer langhe tijt]

Item in desen seluen tijt waren die vier landen vergadert Tantwerpen seer langhe tijt omme te besien hoe datmen tlant van Vlaendren best soude moghen houden ende bewaren yegens die macht vanden coninc van Vranckerijcke.

      C Dit naeruolghende gheschiede binnen den iaere.M.CCCC.ende.lxxx.

[Den.xvi.sten dach van April]

¶ Item vp den.xvi.sten dach van April naer paesschen so was die vesperye ghedaen van mer Lodewijc de baenst, als Foreestier met sinen medepleghers, ende waren ghecleet in witten fluweele, met roode cramosijnen wambaysen, ende reden elck met sijnen state ten Eechoute naer die costume, ende van daer ter bane, ende daden also vesperye. Ende vp den seluen dach deden ooc vesperye twee ionghers van Rijssele. Ende smaendaechs voor dye noene dede vesperye een ioncman vanden Damme Ende vp den seluen maendach tsachternoens hieltmen tsteicspel naer die costume, ende men

[fol. CC.xix.r]

houeirde sauents vp Tschepen huys. Ende was als doe Foreestier ghemaect Clays van Montengijs, ende den beer was ghegheuen den coninc vanden Spinette te Rijssele. Ende die van binnen waren alle ghehuwet die doe staken.

¶ Item in dit iaer lieper vele huyt Brugghe poorters, ende andere van schulden, ende vluchten som in Zeelandt, andere in cloosters, ander vp tproosche, elc daer hi mochte, twelc een sake was wel om te beclaghene, want daer mede die gheloofsamichede onder tvolc began te vergane, ende was ghenouch een beghinsele vander declinacie van der stede van Brugghe, twelck gode gheclaecht si, daer si als noch in es, god betert