Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe die hertoghinne, me vrau Marye van Bourgoengien te Bruessele ghelach van een schoone ionghe dochtere, ghenaemt Margriete, ende wart seer eerlic kersten ghedaen.

[fol. CC.xviij.v]

ITem corts daer naer soe track die Prinche te Bruessele, ende me vrauwe die hertoghinne ghelach daer van een schoone ionghe dochtere, ghenaemt Margriete. Ende haer Petrin was mijn here van Arghuwe Ende hare metten waren die Duwagiereghe, ende mijn vrauwe van Rauesteyn, die welcke haer gauen costelicke ghiften.

¶ Item in dese selue maent tvolck van Ian van Dadyseele trac soucken auentuere ontrent Bethune, ende vinghen eenen lantsman fransoys sijnde, dye welcke badt om ghenade, ende datmen hem woude laten gaen, hi soude hem lieden eenen goeden butijnck wijsen. Ende leedese in een plecke daer ontrent, daert als doe keermesse was, ende si sloughen daer inden hoop. Ende si vonden daer eenen groten ruden man, ende was een Argoenoys, dye welcke metten Fransoysen was, ende was saudenier vanden coninc, dye welcke si vinghen ende vp hilden, omme datmen seyde dat hi een Ruese was.

¶ Item vp desen tijt soe stont dye wet van brugge, ende doe so quam huyter voorseyde orloge mer Ian van Nyeuwenhoue.f.Clays met menichte van volcke dat onder hem was, als haghepoorters ende eeneghe smalle steden, ende quamen inden burch in ordonnancie. Ende die capiteyn presenteirde ende gaf daer ouer der wet van Brugghe den standaert vander voorseyde stede. Ende aldus nam hi daer oorlof, ende elc trac in tsijne ende in sijn ruste.

[Den eersten dach van Lauwe. Anno.lxxix en den derden dach van Sporcle]

¶ Item vp den eersten dach van Lauwe. Anno.lxxix.soe beswoer het Baliuschip van Brugghe mer Roelant van Haelwijn, in die stede van mer Iacob van Haelwijn, die welcke bleuen was inden strijt te Vyenyle voorseyde. Ende vp den derden dach van Sporcle, ende was vp eenen donderdach, so worde Schouteeten van Brugge mer Anthonis vander Vicht, ende Willem die wintere dye was verlaten, ende hi hadde ontrent neghen maenden Scouteeten gheweist.

¶ Item in desen seluen tijt ontrent vastenauent, so trauwede Petijt salasaert een edele vrauwe een wedewe van Valenchiene, daer hi hem vermat in sijn brulocht dat hi vi.nachten vernachten soude in sijnder vianden lant, also hi ooc dede, want hi track al tot Ardanen toe met ontrent.v^c. peerden, ende brochte met hem vele gheuanghenen, ende eenen grooten roof. Maer hy hadde eerst dye mare ghedoen gaen dat hi tcasteel van Bouchein soude vitaelgieren. Ende daer omme dye fransoysen metten garniesoene van Atrecht ende van Bethune, ende van Theerenburch waren daer ontrent sijns verbeydende, maer hi reedt Oost, ende si waren west.

¶ Item ontrent half vastene so was die Hertoghe Maximiliaen in Hollant, omme dye Houcx ende die Cabbeliaus te paeyseirene, also hy ooc dede binnen lancheyt van tijden. Daer hy seere rijckelic ontfaen was, want hy dye voorseyde partyen in paeyse stelde, als voorseyde es.

[Den.xxiij.sten dach van Maerte]

¶ Item vp den.xxiij.sten dach van Maerte voor paesschen, waren te Brugghe ghebannen.lij.personen onder mans ende vrauwen, onder welcke datter.iij.ghebannen waren elck.L.iaer. Ende was haer tijttele dat si hadden ghedaen yeghens tweluaren vanden prinche ende vander stede van Brugghe, waer of deene was een temmerman, dandere een caerdemakere, ende die derde een tegheldeckere, die de preuilegien las in die beroerte van Brugghe.