Dits die Excellente Chronijcke van Vlaenderen (1531)

Dits die Excellente Chronijcke van Vlaenderen

(1531)–Anoniem Dits die excellente cronike van Vlaenderen– rechtenstatus

Auteursrechtvrij

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Vorige Volgende


[Dit es den strijt van Blangijs] Dit es den strijt van Blangijs, ende was de eersten strijt die de hertoghe Maximiliaen vacht binnen sijnen leuene, ende was den eersten staenden strijt, dye binnen meneghen tijt gheuochten was.
[Folio CC.xvi.v]

[Den.vij.sten dach van Ougst] ITem aldus die fransoysen siende den Hertoghe Maximiliaen so cranckelick te velde ligghen met cleenen volcke, naer dye macht die si hadden. Si quamen wel met xxviij.duysent mannen, waer of dat si hadden ontrent.xviij^c.glauyen, ende wel.xv.duysent Aertchiers, beselscheip onder.xviij.capiteynen, ende sy meenden den hertoghe met sijnen volcke huyten velde te smijtene. Maer daer omme machmen wel segghen een ghemeen prouerbie die men secht in walsche, Tel cuyde qui fault. Maer dye Hertoghe Maximiliaen beseghende al sijne behendichede, dede buyten Theerenburch ouer een Riuiere een brugghe maken, daer hy met alle sijnen volcke ouer track, die vianden ghenakende, also dat si vp den.vij.sten dach van Ougst versaemden.Anno.lxxix. Ende was vp eenen saterdach dat desen bloedeghen strijt gheuiel, want dye fransoysen waendent wel al ghewonnen te hebben. C Item die edel Hertoghe Maximiliaen stelde al sijn volc in goeder ordonnancie, ende hi sprac hem lieden toe met seer troostelicke woorden, segghende. O edele vlaminghen sijt nv vroom ende onuersaecht als ghetrauwe kijnderen, ic sal hu lieden al mijn leuen lanc een goet ghetrauwe here blijuen. In welcke woorden si seere versterct waren, ende hi beete van sijnen peerde te voet, ende hi maecte van vele edele mannen Rudders, huyten Ghendtschen, huyten Brugschen, ende ooc huyten vryen ende andere plecken. Ende hi beval elcken mensche neder te knyelen vp beede haer knyen, ende te lesene.v.Pater nosters, ende.v.Aue marien ter eeren van Christus heleghe.v.wonden, gracie ende victorie begherende aen gode van hemelrijcke ende aen sijn ghebenedyde moedere Maria, dat si dye crijghen mochten yeghens hare vyanden, ende dat elck mensche vasten soude den eersten vrydach te watere ende te broode, ende dies niet en vermochten, dat hi.ij.groten om gode gaue. Ende dit ghedaen sijnde die Hertoge sadt weder vp sijn peert, ende seyde hemlieden dat sy hare battaelgie te samen houden souden, hem lieden vast in een luyckende in goeder ordonnancie, ende altoos dye pijckeniers rontsomme staende, hare glauyen den vianden biedende, twelck si vromelick deden. ¶ Item die Capiteynen vander auangaerde, als mijn here van Rommont, mijn here van Santreyn, mijn here van Fienes, ende petijt salasaert ende andere die stelden hem so clouckelic ter weere in battaelgien, van snuchtens tijlicke tot den.iij.hueren naer die noene. Ende dit was te doene een groote mijle buyten Theerenburch ouer die Riuiere voorseyde, vp een schoon velt, ende es ghenaemt Vieuvyle, by een casteel gheheeten Bouuijn, daer die fransoysen seer clouckelick aen quamen. Ende dit merckende die Capiteyn vander Riergaerde, hy vloot met meneghen man haestelick huyten strijde, rijdende Taryen waert, daer hem die poorte voort hooft ghesloten was, ende keerde weder met lettel eeren met openbaer bannieren, daer naer ghinghen die trompetten aen beede sijden ende die fransoysen reden vp onse pijckeniers so dat dye vlaminghen hem lieden of sloughen drie battaelgien met groten moede, so dat alle haerlieder battaelgien gheschuert waren, ende die hertoge Maximiliaen reedt selue enden hoop vanden Fransoysen. Ende als die fransoysen dat aensaghen, si namen die vlucht met grooter haeste naer Hesdijn, daer sy gheiaecht ende ghesleghen waren tot by Hesdijn. Ende tlantvolc van daer ontrent quamen den vlaminghen ter hulpe, grote moort doende onder die fransoysen, alsoo dat die hertoge Maximiliaen byder gracien gods, daer tvelt behilt ende hadde die victorie. Ende die vlaminghen commende int parc vanden fransoysen, vonden daer.xxxvi.serpentijnen gheteekent alle metter croone van Vranckerijcke, ende noch.v.cortauwen, ende een grote bombaerde. Oock vonden si wel vi^c.carteelen wijns onder cleene ende groot, ende vele meils, broots ende spijse, ende allerhande vitaelgie, ende.xl.tonnen buspoeders, het welcke die vlaminghen wel te passe quam, want si waren vermoeyt van vechtene, ghemerckt dat het was wel.vij.hueren inden auent. Ende als dyt volck van wapenen wat vecouuereirt was met eten ende met drinckene, so quam die Hertoghe Maximiliaen weder blijdelic bi hem lieden met groter dancbaerheyt, hem lieden bedanckende. Ende hi badt hem lieden dat si weder knielen wilden,
[Folio CC.xvij.r]
ende noch.v.Pater noster ende Aue maria lesen ter eeren van gode, hem danckende ende louende vander gracien ende victorie die hy hem lieden verleent hadde, twelcke si alle minlicke deden, ende hi daer mede selue in persone. Ende dit aldus gheschiet sijnde, trocken weder binnen hueren parcke, ende die Hertoghe dede sijne ghequetste mannen voeren binnen der stede van Aryen, omme al daer te ghenesen. Ende es waer dat binnen hondert iaren niet so vele fransoysen verslegen en waren daer so lette vlaminghen bleuen. Want daer waren versleghen wel.x.duysent fransoysen. Ende es te wetene dat die franckartchiers seer clouc waren ende vrome mannen, dye hem huyter maten seere weerden, al wast dat si ghequetst ende seer ghewont waren. Ende es waer dat sy meenden al Pycaerdyen ende Vlaendren duere te gane, ende al te bederuene, ghelijck hier voortijts die huynen daden, want die fransoysen brochten met hem lieden vleghels ende wannen, quernen ende houenen om broot te backene als wanende alle tlant al gheheel of te loopene sonder weere, ende daer hem lieden die steden wederstaen hadden, so souden si vp die dorpen tcoorne huyten schueren ghehaelt hebben, ghedorsschen, ghemalen, ende ghebacken. Ende brochten mede forretten om in dye Dunen, ende in andere waranden te iaghene naer die conijnen. ¶ Item binnen den seluen tijt dat den strijt was, so quamen eeneghe verraders van achtere, ende stolen tseluere vanden hertoghe Maximiliaen ende andere yuweelen, ende ooc die katheylen vanden vechtende vlaminghen. Ende men seyde dattet al bekende dieuen waren, ende oock dye selue die eerst die vlucht maecten. Ende als die battaelgie toegaen soude, doe quam tgarnisoen van Theerenburch met grooter menichte van wijfs ende mans, ende maecten die riergaerde vluchtich, ende staken die vitaelgiers die kele of Ende in dese riergaerde waren vele heynewieren ende pycaerden, daer eeneghe vanden heeren letter eeren aen behaelden, want in dyen si nyet gheuloden en hadden, alle die Fransoysen soudender tsamen ghebleuen hebben. Anno domini.M.CCCC.ende lxxix. Te vieuyle seuene in Ougst daer vacht Oostenrijcke dodende die fransche macht C Hier volghen die heren vanden Fransoysen die doot bleuen inden voorseyde strijt. Eerst die Amyrael van Vranckerijcke Die graue van Meyne Die heere van Cleermont Die heere van Cricky Mer Anthonis van Crieuecuer Die muenick van Brueke Gabace heere van Dordan Die heere van Marguy Die heere van Tourchy Die Senescael van Normandyen. Mijn heere van Ruys. Die heere van Blangon. Die heere van Blangiers Die heere van Vaudemont Die graue van Premeulx Die heere Morissis Die heere van Brandicourt, ende meer ander. C Dit sijn die doode heeren vanden vlaminghen. Eerst mer Iacob van haelwijn Ioos Raeuleir Mer anthonis van haelwijn Pieter van Ardenburch ¶ Dit waren die gheuanghen, als voren Eerst mijn heere van Meerwede Mijn heere van Eluerdijnck ¶ Dit sijn die nyeuwe Rudders aldaer ghemaect. Eerst Ian van Dadyseele Anthonis vander Vicht Ian van Nyeuwenhoue.f.Clays Ioris Ghijselein Anthonis Dauchy Iacob de voocht Lodewijc de Baenst.f.Lodewijcx Cornelis van Boonem ¶ Item desen voorseyde bloedeghen strijt aldus gheuochten sijnde, ende die victorie aen onse sijde wesende. Dies was te Brugghe eene schone deuote processie generale ghedreghen in sint Saluators kercke, ende dat weerde heleghe bloet was mede ghedreghen daer onse Princersse met al haren ioncfrauwen mede ghinc baeruoets in die processie, elck met een barnende keerse in dye
[Folio CC.xvij.v]
hant, ende alle die collegien, ende alle hooftmannen, Dekenen, ende eedt van allen ambochten ghinghen oock baeruoet, ende elck met eender keerse als voren, ten loue ende eeren gods, ende om hem te danckene van deser schoonder victorie. Ende die processie weder keerende, so was vp dye marckt voor onse vrauwe eenen schoone stacie ghehouden daer theleghe bloet rustede, daer men schoone Collecten sanck van dancbaerheden. Ende die Princersse knyelde daer neder also lange als dat gheduerde, met een keerse van witten wasse in haer hant al barnende, ende mijn here vanden Gruythuyse was altijts by haer. Ende dit was die.ix.ste reyse datmen theleghe bloet ghedraghen heift in sulcker manieren ,waer of dat wy gode nemmermeer te vullen ghedancken en connen. In veteri villa rigido certamine francos Vicit dante deo dignus honore leo Amen.

Vorige Volgende

Over het gehele werk

landen

Over dit hoofdstuk/artikel

datums

7 augustus 1479