Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den seluen dach naer die noene so track mijn here van Meerewe]

Item vp den seluen dach naer die noene so track mijn here van Meerewe, als capiteyn van die van Brugghe, metten haghepoorters ter oorloghe waerts, ende Ian van Nyeuwenhoue.F.Clays als burchmeester vanden Courpse, twee schepenen, ende eenen Raet, ende een clerck ghenaemt Pieter van Ardenburch, ende een ghedeel dienaers van Brugghe, ende Ioos Rauwelijn, als man van wapenen, ende souden vergaderen te Cassele, ende daer souden ooc commen die vrylaten, ende van daer souden si gaen daert den Prinche ghelieuen soude, sonder eenich verbeyden.

[Den.xxvij.sten dach en den.xxviij.dach van Hoymaent.Anno.lxxix]

¶ Item dese edele hertoghe Maximiliaen ouermerckende die menichte van sijnen ende van alle den anderen goetwilleghen volcke, doen ghinc hi te velde slaen, belegghende die stede van Theerenburch, vp den.xxvij.sten dach van Hoymaent.Anno.lxxix.

¶ Item Theerenburch aldus beleyt sijnde, mijn heere van Nassauwen, mijn heere van Rommont, ende mijn heere van Croy, als Capiteynen vanden vlaminghen, dye welcke waren wel.xxij^m.mannen sterck, frisch volck ende wel gheabilgiert. Ende men seyde dat noeyt schoonder Aermeye gesien en was metten Prinche in tvelt van edelen mannen ende van anderen volcke, wel ghewapent ende vroom van persoone.

¶ Item alle die principale edele mannen vanden prinche die droughen alle den rechteren aerme bloot, niet dan met een hemde mauwe. Ende hadden belooft niet te cleedene noch te wapenen den rechten aerme, voordat dye fransoysen souden commen om vechten yeghens die vlaminghen, alsoot bleec, want sijt niet eer en deden.

¶ Item vp den.xxviij.dach van Hoymaent quamen die van Theerenburch huyte omme te scermutsen, daer Petijt salasaert yegens trac, ende iaechdese weder binnen der stede. Maer hi ghecreech den capiteyn vanden Francaertchiers hem negenster gheuangen Ende die voorseyde Capiteyn hadde ouer hem.vi^c. gouden croonen, die hem petijt salasaert nam.

[fol. CC.xvi.r]

[En.ij.sten dach van Ougst.Anno.lxxix]

¶ Item mijn heere van Crieuecuer Capiteyn generael vanden fransoysen, hi dreechde langhe den Hertoghe van Oostenrijcke te commene beuechtene, maer hi en hielt sijnen dach niet. Niet te min die fransoysen ontsaghen die macht vanden Prinche. Dies sandt die coninc vele edele mannen in Theerenburch, om Theerenburch te bewaren Om welcke cause me vrauwe van Bourgoengien dede draghen te Brugghe eene deuote processye, in onser vrauwen kercke, den.ij.sten dach van Ougst.Anno.lxxix.daer sy selue mede ghinck baeruoets, met een barnende keerse in haer hant seere deuotelick. Ende naer die messe quamen die van sinte Donaes, metten anderen collegien, tot vp die marct voor die halle, daermen eene schone stacie hilt metten heleghen Sacramente, ende sanck diueersche Collecten te loue van onsen here, daer meneghen traen was gheweent van deuocien.

[Den seluen.ij.sten dach van Ougst]

¶ Item vp den seluen.ij.sten dach van Ougst doe trocken eeneghe Capiteynen, wel ghestoffeirt van volcke van wapenen tot bi Blangy, daer si vele Francaertchiers vonden slapende, ende sonder weere. Ende Petijt salasaert met sijnen volcke stacker wel.iij^c.die kele of, ende hi ghecreech wel.lxxx.costelicke peerden die alle int heyr vanden prinche vercocht waren