Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den seluen tijt sandt die coninc van Vranckerijcke drie schepen te Inghelant waert]

Item vp den seluen tijt sandt die coninc van Vranckerijcke drie schepen te Inghelant waert, daer tghelt in was vander Saudye om die Lourd dauwaert, omme dat hi met.x^m. Inghelschen soude commen vp Vlaendren, ooc wasser vele corens inne, ende gulden abijten, ende sijden laken daermen die Inghelsche heren mede beghift soude hebben, maer die schepen vanden Graue van Rommont, die generael Capiteyn vander zee was si wordens gheware, ende seylden aen die.iij.voorseyde schepen, die welcke doe terstont huyt staken die wapene van Vranckerijcke. Ende die schepen vanden graue Rommont namen die voorseyde fransche schepen, ende brochtense ter sluys, ende namen al tghelt ende yuweelen. Ende die graue van Rommont vercochte tcoorne ter Sluys selue metter hant.

¶ Die coninc van Inghelant dede me Lourd dauwaert vanghen, hem twaelfstere van heren, want hi van deser saken niet en wiste. Ende die coninc van Vranckerijcke in desen seluen tijt beval so wie dat hem ghebringhen conste leuende of doot den bastaert van Simpol, hi souder hem vooren gheuen twee duysent cronen. Ende daer omme dede dye bastaert hem ende al sijn volc haerlieder haer of scheeren, ende hi ghinck alsoo simpelick ghecleet als sijn volc, omme datmen hem niet bekennen en soude.

¶ Item in desen tijt in die maent van Wedemaent.Anno.lxxix.waren die garnisoenen die welcke laghen in Theerenburch, in Bethune, ende in anderen plaetsen ontrent onsen palen van Vlaendren, diueersche plecken, ende sy daden seer groote schade daer ontrent.

¶ In dye selue maent vp eenen saterdach quamen die fransoysen weder ontrent Meerreghem omme te pilgierene eeneghe engienen, die te Rijssele te schepe ghedaen waren omme te voerene in dye stede van Aryen. Ende es te wetene dat Ian van Dadyseele daer of last hadde, omme die te bewegene metsgaders eeneghe lieden die hi onder hem hadde huyter Casselrye van Ghendt, ende waren alle ghecleet peersche ende wit. Ende dese voorseyde Ian wederstont daer die fransoysen ende veriaechdese, maer daer bleuen een deel lieden doot aen beeden sijden. Ende ons volc schoot metten seluen engienen inden hoop vanden fransoysen, maer die Fransoysen waren al te peerde, ende ons volck was al te voet. Aldus en mochten si die Fransoysen nyet volghen.

¶ Item omme dat Ian van Dadyseele voorseyde den Prinche ende den lande so ghetrauwelic ghedient hadde, soe worde hy wat wedersien van eeneghe heren huyten houe. Ende corts daer naer die fransoysen quamen weder vp twee mijlen naer Ipre, aen dander sijde vanden watere, omme tlantvolck te beroouene daer ontrent.

¶ Item Ian van Dadyzeele met sijnen volcke was corts ontboden dat sy thuysewaert commen souden, alsoo si daden. Ende tes te wetene dat eeneghe wethouders vander stede van Ghendt, als ghedeputeirt vander stede weghe, waren met Ian van Dadyseele omme te bestieren haerlieder casselrye, also si ooc voren ghedaen hadden, ter eere vanden prinche ende ten orbore vanden lande van Vlaendren. Ende dye Prinche beual hem lieden dat si van danen scheeden souden, ende dat si binnen.xv.daghen daer naer weder bi hem commen souden, omme tlant te bewarene so si te voren ghedaen hadden.

¶ Vp desen seluen tijt was die Burchmeestere vander stede van Brugghe ter orloghe waert met mijn here van Meerwede Capiteyn vanden haghepoorters

¶ In desen seluen tijt was een grote moeyte in Hollandt tusschen die Houcx ende die Cabeliaus, welcke orloghe oorspronc nam om dat dye Houcx met ghelde ghecocht hadden het gouuernuerschip van Hollant yeghens den hertoghe Maximiliaen, twelc gouuernuerschip weerdich es tsiaers.xx.duysten croonen. Ende die voorseyde Houcx gauen dyt gouuernuerschip den Graue van Boochein heere vander Vere in Zeelandt, ende was gheheeten Wulfaert van Borsele, ende hier omme waren die Cabelyaus seere gram. Ende sy trocken byden

[fol. CC.xv.v]

hertoghe Maximiliaen, ende boden hem noch so vele ghelts als hem die Houcx ghegheuen hadden, ende si wilden Gouuernuer maken mijnhere van Rauesteyn, daer omme waren die Houcx seere ghestoort, ende si trocken inden Haghe met mijn here vander Vere, ende wiepen omme thuys van Egmont, ende thuys van Wassenare, ende stakender tvier inne.

[Den.xiij.sten dach van Hoymaent Anno.lxxix]

¶ Item vp den.xiij.sten dach van Hoymaent Anno.lxxix.soe waren voor dye stede van ghendt haerlieder casselrye huyt vier ambochten omme te treckene ter orloghe waert, ende ten dienste vanden Prinche, ende laghen daer.iij.of.iiij.daghen om sekere questye die si hadden yeghens die van Ghendt.

¶ Item hoe wel datter was een persoon heetende Ian van coppenolle, dye gheerne die saken ten besten ghebrocht hadde. Daer vp dat si antwoorden, dat houde costume was dat si behoorden binnen der stede te commene, ende ter marct te gaen stane, tot dat die van Ghendt ter oorloghe waert trocken met bannieren, tenten, pauwelioenen, also der huytvaert toebehoort, ende dan soe souden si haerlieder hooft volghen. Waer omme dat eeneghe vander Casselrye wilden hem veruoorderen om te commene binnen ghendt. Twelc die here ende die wet niet ghedooghen en wilden, waer of dat quam een groote beroerte, waer omme dat die heere ende dye wet snachts groot awet hilden, ende vele goede mannen quamen bi hem lieden, ende daden so vele dat die Casselrye eerselen moesten wel een mijle vander stede, tot vp een dorp ghenaemt Muelensteke. Ende was gheordonneirt dat Ian van Dayzeele ende Ian van Coppenolle souden trecken byder Casselrye van Ghendt met sijnen volcke. Ende hem lieden wort gheuraecht of si vertrecken wilden ter reysen gheordonneirt also hem lieden te kennen ghegheuen hadde gheweist, met vele goede woorden daer toe dienende. Ende si verantwoorden dat si smorghens vertrecken souden, ende vertrocken. Maer daer wasser huyten hoope wel.xiiij.gheuanghen vanden principaelsten, ende gheleet te ghendt waert. Maer ter bede vanden Balin, vander prochye van daer die persoonen waren, so waren die.xiij.personen ontsleghen ende laten gaen, maer die.xiiij.ste die bleef ghevanghen, ende daer naer ghebannen.L.iaer huyt den lande van Vlaendren.