Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Tincarnacioen vanden strijt voorseyt

H      opelick herte	M      anlick gheadert
E      erweerdich prinche	C      uerieuselic troost
R      ijsende sterre	C      rachtich vergadert
T      vlaemsche volck	C      louckelick dat begloost
O      ntsiende seer	C      leen al tvransche roost
G      rieuelick versleghen	L      euerende ter doot      ☩
H      u seluen houdende	V      ry onghenoost
E      nde v volck meest	V      ruecht es dies groot
M      yracle gods	V      looch in huwen schoot
A      ensiende ghy	V      echtende voor hu recht
X      duyst warer	V      ersmoort in bloede root
I      ammerlick si vloon	I      n dat gheuecht
M      et rechte men	I      onste thuwaert lecht
I      ae meer dan	I      ck hier can ghescrijuen      ☩
L      eeu die sijt vul moets	I      nghelick beurecht
I      hesus wil hu	T      Ealder stont by blijuen
A      ls.vij.in Ougst	V      YEl dit swaer kijuen
E      eerlick voor ons	V      Ylonye ontgaende
N      oeyt en was die crone	L      Eelicker dach ontfaende

Anno.M.CCCC.ende.lxxix.

[Den.xx.sten dach van Ougst.Anno.lxxix]

¶ Item desen strijt ghedaen sijnde, die prinche trac naer Ipre, daer hi blijdelic ontfanghen was, ende van daer te Ghendt, daermen hem grote weerdicheyt dede. Ende dye van Ghendt brochten hem yeghen sijnen sone Phelips, die welcke hi vriendelicke in sijnen aerme voerde tot int hof ten Walle. Ende die van Ghendt gauen hem.xiiij^m. croonen te sijnen costen waert, ende schade die hi ghehadt hadde vp den.xx.sten dach van Ougst.Anno.lxxix

¶ Item inden seluen tijt hadden dye Fransoysen binnen Theerenburch vele waghenen met goede gheladen, dye si meenden te voerene te Hesdijn, ende also te Vranckerijcke waert. Maer dyt vernam Phelips van Rauesteyn ende mijn here van Beuere, dye clouckelick die fransoysen bespronghen in dit vertrecken, ende sloughen hem lieden of wel hondert glauyen, ende si brochten alle die waghenen metten goede binnen sint Omaers.

[fol. CC.xviij.r]

¶ Corts daer naer soe naecte den harijnck tijt, so dat die visschers al toe reeden te haringhe, ende specialic dye van Oostende, want vp dyen tijt voeren huyt Oostende wel.xliiij.busen. Ende ander plaetsen ende dorpen voeren ooc ter zee naer haerlieder vermoghen, so dat si grote menichte waren.

¶ Item die fransoysen van Ruwaen, van Diepen, van Hontfleur, ende van Buenen versaemden een groote menichte van schepen van orloghen, ende vinghen alle den meesten deel vanden visschers van Vlaendren, ende ooc van Hollant ende van Zeelant, ende steldense tot groten rentsoene, ende ghecreghen also grote sommen van penninghen. Ende hier of waren cause dye Hollanders ende die Zeelanders, want si beloofden ter zee te commene met xvi.schepen van orloghen, om dye visschers te bewarene, maer si en dadens niet.