Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[¶ Hier naer volcht doordonnanchie ende maniere, die binnen der stede van Brugghe ghedaen was]

¶ Hier naer volcht doordonnanchie ende maniere, die binnen der stede van Brugghe ghedaen was, ter eeren ende blijschap vander gheboorte van den edelen Hertoghe Phelips, den eersten sone van hertoghe Maximiliaen, ende vrau Marie van Bourgoengien, eeneghe dochtere vanden edelen Hertoghe Kaerle. Anno domini.M.CCCC.ende.lxxviij.

¶ Dat.lxvij.Capittel.

[fol. CC.vij.r]

[Den xxij.sten dach van Wedemaent]

ENde es te weten dat si ghelach vanden voorseyde Phelips vp den xxij.sten dach van Wedemaent naer dye noene, in haer hof te Brugghe. Dies was grote blijschap binnen Brugghe, ende men dede alle die clocken luyden ende beyaerden in alle die prochiekercken, cloosters, cappellen, ende godshuysen, twelcke gheduerde alle den achternoene, ende meest alle den nacht. Ende die Burchmeester dede van blijschepen terstont het schauot of breken dat langhe tijt inden burch ghestaen hadde. Ende men maect sauents in alle straten schone vieren, dansende ende vele ghenouchten bedrijuende, trompende, harpende, ende luytende, al den nacht gheduerende. Ende des anderdaechs wast gheboden mesdach te houden, twelcke was sint Ians auent. Ende daermen tghebodt dede, daer was present mijn heere vanden Gruythuyse, ende dye Burchmeester van Brugghe dheer Martin Lem. Ende si deden den volcke roupen Noel, ende men sayde daer ghelt ter hallen huyt onder tvolc, ende waren alle selueren penninghen, waer of dat die minste waren nyeuwe grootkins Ende vp alle dye torren vanden kercken staken vierpannen huyt al den nacht. Ende vp sint Ians auent was ghedreghen eene deuote processie generale, om god te danckene van dese blijder gheboorte, welcke processie men drouch ronts omme mijns heren hof, ende van daer tonser vrauwen, daer men den dienst dede. Van welcker blijder gheboorte men groote triumphe bedreef vp den seluen dach in alle steden, ende plaet

[fol. CC.vij.v]

sen al Vlaendren duere, ende was dien dach mesdach gheboden.

[Sinte Pieter ende sinte Pauwels dach]

¶ Item corts daer naer vp sinte Pieter ende sinte Pauwels dach doe die ionghe Prinche acht daghen oudt was, doe was hi naer dye noene vp den voorseyde dach ghedreghen met rijckelicken state te sinte Donaes kercke, ende aldaer kersten ghedaen, ende sijnen name was gheseyt Phelips. Ende daer was ghetemmert eenen ganck ontrent.viij.voeten wijt, ende.v.voeten hooghe bouen der eerde, versoldert met plancken ende met lenen aen beeden sijden streckende van sprinchens hofduer.s.Amants strate, ouer die marct duer die breyelstrate, tot in dye Suytduere van sinte Donaes kercke, die welcke kercke rijckelic behanghen was met costelicke tapijtserye van vreimde diueersche hystorien

¶ Item inden middel vander kercke voor den docsael was ghemaect een viercante staedgie, daer vp dat ghestelt was een vonte van houte, behanghen met gulden lakene, ende daer vp een selueren verguld becken, also groot datmer wel een mensche in soude ghebaet hebben, dwelcke bouen verdeckt was met eenen hanghenden pauwelioene van sijde ghemaect seere rijckelick.

¶ Item daer was wt ghesonden om alle die gheestelicke Prelaten, ontrent Brugghe, als Abten, Proosten, ende Pryooren, ende ooc omme die Rudders ende edele van Vlaenderen dye welcke een groot ghetal quamen te Brugghe elck met sijnen state.

¶ Item die schotters vanden.iij.boghen, te wetene den ouden boghe, den ionghen boghe, ende den hantboghen die stonden lancx der alleye vanden houe tot sinte Donaes kercke toe. Ende oock waren daer ghebeden eeneghe ghedeputeirde vanden smallen steden, die welcke te Brugghe quamen, ende begonsten also te gaene lancx der alleye voorseyde elck met eender brandende toortse in die hant, vijf libra weghende.

¶ Eerst so ghinghen die vander sluys met iiij.barnende toortsen, daer naer dye vanden Damme met.iiij.toortsen, daer naer die van Ardenburch met.iiij.toortsen, daer naer dye van Oostende met.ij.toortsen, daer naer die van Blanckeberge met.iiij.toortsen, daer naer quamen die notable vander poorterye eerlicke ghecleet met swarten abyten, wel met.C.ende L.toortsen, daer naer quamen.ij.wethouders, ende een Pensyonaris van Ghendt met drye toortsen, daer naer quam die wet van Brugghe met.xxvi.toortsen, daer naer quamen dye edelinghen vanden houe onder grote ende cleene, wel met.C.toortsen, ende die ionghe hertoghe van Gheldre drouch ooc een toortse.

¶ Voort so ghinghen voren in goeder ordonnanchie, eerst.vij.ghemitreirde Abten, ende viij.ander Abten met schoonen state. Daernaer so quam tcollegie van sinte Donaes, al met coorcappen seer rijckelic, ende hem lieden volchden eeneghe vander cappelle van den prinche, ooc met costelicke coorcappen Daer naer quam die Bisschop van Sareyten, ende daer naer die bisschop van Doornicke, daer naer quam die Erault vanden Toysoene met een gulden abijt aen, ende voor hem ghinghen vele Heraulten met cornijckeelen aen, daer naer quamen.xij.Rudders van den edelsten van Vlaendren. Daer naer quam me vrauwe de Duwagiereghe, wedewe vanden hertoghe Kaerle saleger ghedachten, ende si drouch den ionghen prinche in huer edele aermen, ghewonden in een gulden laken, ende mijn vrauwe van Rauesteyn die ghinc neffens haer, te harer rechter sijde, aen hebbende een gulden bijt van orfeuerye. Ende mijn heere van Simpol die ghinc tot harer slincker sijde aen hebbende een abijt, ooc van gouden lakene, maer voor hem lieden ghinc mijn heere vanden Gruythuyse, ghecleet met gulden lakene cramosijn, ende hy drouch voor tkint een gulden becken weerdelicken. Ende tgulden laken daer men tkint vp drouch was een seer costelic stick. Ende in deser manieren was tvoorseyde kint ter kercken ghebrocht van sinte Donaes, daerment kersten dede.

¶ Item dye stede van Brugghe schand den ionghen Phelips viere selueren vergulden cannen, ende vier guldene flasschen, ende eenen grooten goudin cop, welcke.ix.yeweelen weerdich waren wel.vi^c.libra groten, of meer. Ende noch so presenteirde die stede van Brugghe mer vrauwe van Bourgoengien bouen dyen die somme van.iiij^c. ponden groten in ghereeden penninghen, tot haer weerdichede.

[fol. CC.viij.r]

¶ Item die Peteren vanden ionghen Phelips waren mijn heere van Rauesteyn, ende mijn here van Simpol, ende sijn Mette was de Duwagiereghe wedewe vanden Hertoghe Kaerle. Ende mijn here van Rauesteyn gaf hem een gulden sweert. Ende mijn heere van Simpol gaf hem eenen costelicken hellem. Ende die Mette gaf hem een costelic Exele, daer vele precieuse steenen aen stonden seer rijckelic. Ende die Bisschop van Doornicke dye dedene kerstene, in die presencie van alle die voornomde prelaten.

¶ Ende dat ghedaen sijnde, dye Mette ende sijn Peteren drougene weder thuysewaert in schoonder ordonnancie. Ende als sijn Mette de Duwagiereghe die hem drouch als voren, als sy quam inden middele vander marct, so hier si den ionghen Phelips hoghe vp, al naect, so datter niet dan een vloers cleet ouer en was, dattene alle tvolc sien mochte, daer si alle seere in verblijt waren ende groote ghenouchte in hadden. Ende men drouch die yeweelen, also wel die hem die stede van Brugghe gheschoncken hadde, als die hem ter vonte gheghift waren, alle voor tkint met groter triumphe, met trompetten ende metten Heraulten. Ende die Hofmeester van den Prinche die stroyde ende saeyde ghelt vp dye marct aen beeden sijden vander voornomder alleye. Ende waren die minste penninghen diemer saeyde, penninghen metten twee leeuwen, of dye halue van dien.

¶ Item die.lij.Dekens ende ambochten van der stede stonden alle met toortsen lancx der alleye beneden aen beeden sijden lancxduere, soe datter waren gheuonden in ghetale, wel.xiiij^c.toortsen of meer staende in ordonnancie, elc naer sijn hoocheyt.

¶ Item sauents was een costelicke maeltijt bereet vp tschepen huys, Ende daer waren die van Ghendt ghenoot ter maeltijt, ende alle die vanden smalle steden die mede ghegaen hadden in processien. Ende daer waren diueersche Esbatementen ghespeilt, ende vele ghenouchten bedreuen. Ende die stede was vul blijschepen, ende vele schone vieren waren ghemaect, ende bogaerden met rijpe kerssebomen gheladen, ende busschen van schonen groenen boomen, ende danssinghen ende allerhande ghenouchten. Ende voor den witten Ram waren te winnene prijsen met Esbatementen, ende met louende dese edele geboorte, die welcke prijsen vp hinghen tambocht vanden scheppers van Brugghe, ende in mijns heeren hof waren die sale ende andere cameren seer chierlic behanghen met schonen tapijtsen. Ende dese feeste gheduerde int hof ende ooc in die stede wel.viij.daghen lanck. Och wat blijschepen hadde die hertoghe Maximiliaen, als hy die tijdinge ontfinc in tvelt daer hy lach, dat hem gheboren was eenen ionghen sone. Ende als hy kersten ghedaen was, ende hem den name was ghegheuen Phelips, dye vruecht dye int heyr was onder alle tvolc dat metten prinche te velde lach dye en was nyet cleene, waer of dat hier nae volcht tincarnacioen.

XXij.in Iunij Marie ghelach
Rauestein saintpol de duwagiere
Hieuen Philips vp sinte Pieters dach
Sinte Donaes ghedoopt, lof den bestiere

Anno.M.CCCC.ende.lxxviij.

Flandria gaude francia luxit brugis i vrbe
Pullo produxit aquile duxissa leonem.

IN desen tijt lach die Hertoghe Maximiliaen altoos te velde, aenden berch van Vyeuijle, vp drie mijlen naer Atrecht, ende hy hadde bi hem een groot gheselschap van frisschen volcke, te wetene duytschen vlaminghen, ende Brabanders, luyckenaers, ende die van Ghendt waren daer met haerlieder Casselrye, ende die van Brugghe met die van den Vryen, ende die van Ipre met haren ondersaten, also dat die prinche sterc was wel xxiij.duysent mannen, metsgaders den heynewieren, aertoysienen, ende tvolc vanden lande daer ontrent. Ende ooc warender wel.iij^c.Inghelschen, ende een ghedeel spaengiaerden. Ende die coninck van Vranckerijcke hadde ooc een grote aermeye bi hem, ende hem quamen te baten wel.vi.duysent Gascoenoysen, ende hi lach Tatrecht, altoos wassende in stercheden van volcke. Nochtan onse Prinche Maximiliaen en verschoot nyet van sconincx moghentheyt.etc.

¶ Item dye van Doornicke verlost sijnde van haren gaernisoene, si worden binnen der stede van Doornicke onderlinge twistende

[fol. CC.viij.v]

ende vechtende. Want deen partye waren goet tsconincx, ende dandere waren goet Bourgoengioens. Also dat die ghene die goet Bourgoengioens waren die fransoysen doot sloughen, ende ghecreghen die ouerhant vander stede van Doornicke. Ende dye van Doornicke siende dat die prince aldus machtich te velde lach, sy hadden groote vreese dattet al vp hueren hals craken soude. Ende daer omme si sonden aenden Hertoghe Maximiliaen een eerbaer Ambassade, metten slotelen vander stede van Doornicke vele daghen lanc gheduerende.

¶ Item in desen tijt int heyr daer die prinche lach, was een quaet respeel van Brugghe, dye welcke wilde eenen gheselle van Ghendt sijn meysen nemen, so dat si worden vechtend. Ende deene riep Ghendt en vrient. Ende dandere riep Brugge en vrient malcanderen verwijtende vele woorden van confusien, also dat die van Ghendt quetsten vele lieden van Brugghe, want die Ghentenaers waren vele stercker van volcke dan die van Brugghe, nochtan so schoten die van Brugghe.iij.Ghentenaers doot. Ende dyt gheruchte dye Prinche vernemende, hy reedt derwaerts met eenen stocke in dye hant, ende dede so vele dat si ghescheeden waren. Ende die prinche beloofde correctie te doene ouer den vpstelders van deser moeyte. Het welcke was eens brauwer sone, die welcke men seer sochte om te vanghen.

[Den.vij.sten dach van Hoymaent]

¶ Item het gheuiel byder gracien Gods datter so neerstelic ghelaboreirt was van eeneghen edelen heren van des conincx sijde van Vranckerijcke.den coninc onderwijsende, dat hi voort aen een oudt man ware, ende dat beter ware dat hi oorloochde vp die Turcken, dan aldus het kersten bloet te sturttene. Ooc warer grote heren van des hertoghen Maximiliaens sijde diere ooc inne laboreirden, so varre datter ghesloten was ouer beede sijden een generael bestant van diere tijt voort, gheduerende een iaer ende.xl.dagen. Dies soude die Coninc alle sijn gaernisoenen doen ruymen, die hi in die vercreghene steden gheleyt hadde. Maer omme die weerdichede vander croone van Vranckerijcke, so trac ons Prinche eerst huyt den velde. Ende van desen bestande waren machtich ghemaect.xij.heeren vi.van sconincx weghe, ende.vi.van sprinchen weghe. Ende dese souden hooren wat cause dat die coninc hadde, ende ooc extimeren die schade die hi in sprinchens landen ghedaen hadde, ende souden rijpelick vp alle saken letten, ende daer of sulc een seggherschip segghen, als datter eenen generalen paeys of commen soude. Ende wie dat seggherschip niet en hilde, die soude verwaten sijn van den paeus van Roome, ende alle die.xij.Aerbijters die souden hem contrarie sijn, ooc soude hi yeghens hem hebben den coninck van Inghelant. Ende dit was aldus ghesloten aen beeden sijden, omme paeys ende ruste tonderhoudene. Ende dit selue bestand dat was openbaerlic becondicht in theyr vanden coninc, ende ooc in theyr vanden prinche. Ende dyt was ghedaen vp den.vij.sten dach van Hoymaent, ende was vp eenen dijsendach.Anno.lxxviij.ende alle tvolc was thuysewaert ghelaten trecken, elc intsijne.

[Vp xviij.sten dach van Hoymaent]

¶ Item die van Ghendt ende die van Brugghe trocken elc haren wech thuysewaert so dat dye van Brugghe thuys quamen vp xviij.sten dach van Hoymaent in goeder ordonnancie ende oordene, ende quamen tot vp die marct, daer si stonden elck onder tsijne daer si behoorden, daer si vriendelick ghewillecomt waren vanden heren ende vander wet van Brugghe, ende van daer elck track thuys in sijne vrede.

[Den.xix.sten dach van Hoymaent]

¶ Item me vrauwe Marie van Bourgoengien dede haren kercganck tsondaechs vp den.xix.sten dach van Hoymaent, binnen harer cappelle in thof te Brugge. Ende alle die maechden die int hof quamen omme den kercganc te siene, die waren alle ghegheuen elck eenen roosen hoet, in teekene van blijschap, dat daer toe ghecommen was.

¶ Item vp den seluen.xix.sten dach vander maent voornomt, was die Bisschop van Sarepten, Suffragaen van Doornicke binnen der stede van Oostende, daer hi in die nyeu kercke dye clocken ende schellen kersten dede. Ende des achternoens so veermde hy alle die kijnderen diet begheerden.

[Den.xx.sten dach vander seluer maent]

¶ Vp den.xx.sten dach vander seluer maent was den eersten steen gheleyt vanden torre vander nyeuwer kercke van Oostende, die

[fol. CC.ix.r]

welcke leyde meester Ian Lammaert, priestere ende prochiepape vander seluer kercke Daer naer quam die bisschop voorseyde, ende gaf den fondamente sijne benedictie, ende hi leyde oock eenen steen. Daer naer quamen twee ionghe kinderkins Thuenkin meeuoet.f.Pieters, ende sentkin meeuoet.f.Cornelis, die welcke Cornelis als doe Burchmeester van Oostende was. Ende daer naer quam Ian Lombaert, glaeswercker van Brugghe, ende hi leyde ooc eenen steen.

¶ Item doe die hertoghe Maximiliaen sijn meeste garnisoen orlof ghegheuen hadde, doen en ruymden die fransoysen die steden nyet alsoot gheseyt was. Doch dochte dye Hertoghe dat hy mesleedt was, ende hy wart wat onlustich van onghenouchten, ende hy bleef altoos binnen der stede van Rijssele, twelc hem van noode was. Ende es waer dat mer Ian van Lutcenburch, ende mijn here van Beuere, ende mijn here van Santreyn, ende die graue van Rommont, dye en wilden in tbestant niet betrocken sijn, maer bleuen altoos roouende ende pilgierende vp die fransoysen, ende vinghense daer si consten.

[Den.xxiiij.sten dach van Hoymaent]

¶ Ontrent den.xxiiij.sten dach van Hoymaent so quamen vele vrauwen van Doornicke ende vele knechtkins met hem lieden, ende si quamen binen Cortrijcke, ende cochten al vp dat ter marct quam, buetere, caes ende sout, ende vulden haerlieder paenders. Dit vernemende dye vrauwen van Cortrijcke, si quamen met groter menichte van vrauwen ende van knechten met slijcken ende met drecke ende met stocken, ende si mesmaecten die wijfs van Doornicke metter vuylicheden vander strate, ende namen hemlieden vele ende quade ende spijteghe woorden. Maer doe quamen dye goede lieden vander wet van Cortrijcke, ende gauen den vrauwen van Doornicke elc een pont bueters in die hant ende hietense thuysewaert gaen, ende dat sijer niet meer commen en souden. Ende al die selue ghebuerde Toudenaerde oock, vp eenen marckedach, ontrent den.xxvij.dach van Hoymaent, als bouen.

[Den.ij.sten dach en den derden dach en den vierden van Ougst Anno.lxxviij]

¶ Vp den.ij.sten dach van Ougst vertrac ons prinche van Rijssele, ende quam te Brugge by sijnen wijue, daer hi blijdelick ontfanghen was, want men groot verlanghen naer hem hadde. Ende vp den derden dach van Ougst soe quam te Brugghe een Cardenael wel met.C.peerden of meer.

¶ Item vp den vierden dach van Ougst. Anno.lxxviij.hadden die Spaengiaerden grote blijschap te Brugghe, want si tijdinghe ontfangen hadden dat haer coninghinne gheleghen was van eenen ionghen sone, ghenaemt Ian, dies bedreuen si grote triumphe. Wan vanden Augustijnen tot Sint Ians brugghe te was die Spaengiaert strate aen beden sijden al behanghen met laken, root ende groen, waer voren stonden vele tortsen, ende dye lakenen verchiert met schonen wapenen van schilderye. Ende daer was een stomme personaedgie ghetoocht, hoe datment kijnt kersten dede, twelc seere schoone om sien was. Ende tsanderdaechs triumpheerden si van ghelijcken, makende costelicke vieren van houte. En vp een poorte daer men duere ghinck, vp welcke poorte wel.viij.vieren ghemaeckt waren, die alle vrolic barnden. Ende die Prinche quam der Spaengiaerden feeste visenteren, twelc sy in groten dancke namen, ende was vp eenen dysendach, ende dye Prinche ende die princersse hadden beede Tardenburch gheweist te peerde, ende sy quam om ten banckette vanden Spaengiaerden te sijne, maer het reinde so seere ontrent den thien hueren vanden auende, als dat dye Prinche ende die princersse met hueren state weder thuys keerden in haerlieder hof. Maer tsanderdaechs wast woensdach, ende doe vernyeuden die Spaengiaerden weder hare triumphe, noch costelicker van vieren ende van als, dant van te voren was. Ende die prinche reet darwaert, ende die Duwagiereghe van Bourgoengien sadt acht vp tpeert vanden edelen prinche Maximiliaen. Ende onse princersse Marie van Bourgoengien reet alleene vrolic te peerde achtere met hueren state van vele edele vrauwen ende ioncfrauwen, ende die prinche was oock gheacompaingiert met vele edele mannen. Ende vp die wijnckelbrugghe ende vp Sint Ians brugghe waren weder schoone nieuwe vieren ghemaect, costelicker dan die eerste waren. Ende daer was eene figuere ghetoocht vanden ion-

[fol. CC.ix.v]

ghe gheboren coninc Ian van Spaengien. Ende daer quamen vijf heraulten rijckelick ghecleet. Deerste presenteirde.v.Conincx croonen. Dandere presenteirde eenen helm met sijnder wapene. Die derde een gulden sweert. Die vierde presenteirde.ij.gulden sporen. Die vijfste presenteirde een coffere met goude. Ende elck Herault hadde een rolle in sijn hant, met eender schoonder auctoriteyt. Ende dat bediede dat dat ionghe kint noch coninc wesen soude van vijf Conincrijcken. Te wetene Spaengien, Arabyen, Cecylien, Aragon, ende Nauarne, twelcke seer schone om sien was. Ende doe wasser sauents een bancket ghehouden met groter tryumphe, ter eeren vanden Prinche ende vander princersse. Ende men saeyde gouden penninghen ende selueren penninghen huyte den huyse daermen het bancket hilt vanden Spaengiaerden

¶ Item tsondaechs daer naer was in thof eene schone brulocht ghehouden van mijns heeren dochter van Cheruy, daer die Prinche sauents ter brulocht was.

[Den.v.sten en den.xvi.dach van Ougst]

¶ Item vp den.v.sten dach van Ougst.Anno.lxxviij.doe was te Brugghe openbaerlic ter hallen huyt gheroupen een vray bestant tusschen den coninc Lodewijc van Vranckerijcke ende den Hertoghe Maximiliaen, te watere ende te lande een iaer lanc gheduerende. Ende daer waren ghenomt alle die heren van beeden sijden, die hem seluen in tbestant verbonden hadden, ende van elcker sijde souden.vi.heeren sijn die binnen desen iaren eenen warachteghen paeys maken souden. Ende en consten si onder hem twaeluen niet accoorderen, soe soudemen noch daer toe nemen den coninc Edewaert van Inghelant, ende die nacie vanden oosterlinghen souden als ghetrauwe arbiters het seggherschip openbaren. Ende so wie van beeden partyen dat seggherschip niet en hilde die soude den coninc van Inghelant yegens hem hebben, ende oock dye nacie vander duytscher hanse.

¶ Item vp den.xvi.dach van Ougst.Anno lxxviij.was die kercke vanden Willemijnen ghewyet te Brugghe vanden Bisschop van Doornicke, in die presencie vanden hertoghe Maximiliaen, ende van sijnder gheselnede ende meer ander heren ende vrauwen.

¶ Item in desen tijt was te Brugghe veil ghenouchten bedreuen, als van danssene ende van houerene, omme dat hem dye prinche so meynderlick te Brugghe was houdende. Ende daer was ooc een costelicke maeltijt ghehouden vanden oosterlinghen, daer die Prinche toe ghebeden was, ende daermen hem grote chiere dede. Ende doosterlinghen plaetse was al behanghen met rooden lakene, ende met schonen toortsen omme stelt seere rijckelic. Ende in sghelijcx was hem groote chiere ghedaen van Martin Lem, di doe woonde aen dye conincx brugghe, dye oock den Prinche met hem noode ten etene, daer grote costelichede ghedaen was so datmen van een poorter noeyt sghelijcx en sach.

[Den.xxvi.sten dach en den.xxvij.sten dach van Ougst]

¶ Item vp den.xxvi.sten dach van Ougst so vertrac die Prinche met sijn gheselnede van Brugghe te Ghendt waert met seere schonen state, daer hi blijdelic ontfaen was

¶ Item vp den.xxvij.sten dach van Ougst, was te Brugghe eenen bandach ghehouden die ontsienlic was, want daer waren ghebannen onder mans ende vrauwen.liij.personen, vanden welcken waren vele wel ghestelde personen, ambochtslieden, ende andere Want daer waren ghebannen drie maetsenaers, ende.iiij.cordewaniers, elck.L.iaer huyten lande van Vlaendren. Andere waren ghebannen.vi.iaer, drie iaer naer die costuyme, dies groote droufheyt ghesien was binnen Brugghe van vrauwen ende van kinderen.

¶ Item vp dien seluen dach was te brugge inden burch een man onthooft, die de brieuen schuerde int huys vanden Vryen, als men daer die rommelinghe maecte, ende was van Iabbeke, ende daer was hi begrauen

[Den.xxix.sten dach van Ougst en sint Ians dach]

¶ Item vp den.xxix.sten dach van Ougst int selue iaer, so was den ionghen Phelips van Bourgoengien gheleyt vp een gulden cussen daer een gulden pelder onder ghespreet was. Ende dit was vp den steeghere vander groter sale in thof te Brugge, ende was daer also gheleyt omme dattene elckerlijck soude moghen sien. Ende als die edele ionghe Phelips wel ghesien was vanden ghenen die daer present waren, doe stont daer bereet

[fol. CC.x.r]

een rijckelic osbaer, daer dye edele voestreghe in ghinc sitten, twelcke was een edele schone ioncfrauwe. Ende men gaf haer den ionghen Phelips in haren schoot, gheacompaingiert met vele edele mannen, die ontrent den voorseyde osbaer ghinghen. Ende also was hy gheuoert te Ghendt waert. Ende dyt was vp sint Ians dach decollacie, diemen secht huytgaende Ougst.

[Den.ij.sten dach van Septembre.Anno lxxviij]

¶ Item vp den.ij.sten dach van Septembre.Anno lxxviij.so was die wet van Brugge vermaect naer tinhouden vanden preuilegien, ende waren Commissaresen desen naeruolghende personen.

Eerst mijn here Phelips van Gasebeke

Die Abt vanden Dunen.

Mer wouter vander gracht      ♠

Mer Lodewijc van Schore

Iacob van Halewijn als Baliu

Mer Anthonis vander Vicht als schouteeten

¶ Item ontrent desen tijt so was een maetsenare van Brugghe, die soude ooc.L.iaer ghebannen gheweist hebben metten anderen, daer voren of gheseyt es, maer hi was verbeden vander nacie vanden oosterlinghen, midts dien dat hy haerlieder wercman te Brugge was. Niet yeghenstaende als dye Wet te Brugge vermaect was, so screuen dye ander ballinghen van.L.iaren grote clachte over den voorseyde maetsenare, seggende dat hi die weckere van alder meuterye was, ende dat iammer was dat hi in Brugghe blijuen soude, naer dien dat si ghebannen waren. By welcken scrijuene dye Burchmeesters beede ghinghen ten wercke vanden voorseyde maetsenare, ende vinghen hem, ende was gheleyt inden steen, also dat hem nyement spreken en mochte vp dien tijt

[Den.xij.sten dach van Septembre.Anno lxxviij]

¶ Item doe quamen die oosterlinghen weder, ende daden so vele aen die vander wet, als dat dye voorseyde maetsenare weder ontsleghen was, maer hy verbant hem vp sijn hooft ende vp sijn goet te verbuerene huyter stede van Brugge niet te treckene sonder, consent vanden heren ende vander wet. Ende dit verbant dede hi vp den.xij.sten dach van Septembre.Anno lxxviij.ende stelde grote borghe daer voren.