Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xviij.sten dach van Meye quamen die van Doornicke met groter machte by Oudenaerde]

Item vp den.xviij.sten dach van Meye quamen die van Doornicke met groter machte by Oudenaerde, in een dorp, daer si al tlant volck in die kercke ioughen. Ende besich sijnde met pilgerene so quamen die van Oudenaerde huyte, metsgaders.iij.hondert Inghelschen, ende lantsvolc van daer ontrent, ende ouerliepen dye

[fol. CC.iiij.r]

Fransoysen, metsgaders Ian die Gheest met sijnder groen tente van Ghendt, ende sy omringden die fransoysen, midts der hulpe van mer ian van Dayseele, hoochbaliu van ghendt, so dat si daer versloughen meer dan.iij^c. fransoysen, ende vinghender vele, ende brochtense binnen Oudenaerde te voet ende te peerde, ende stakense alle die kele of, sonder te rensoene te stellene, behoudende wel.L.peerden. Maer eer dit ghebuerde so wasser een Capiteyn binnen Doornicke, gheheeten Morissis de neufcasteel, dye welcke swoer Waert dat hi den Gheest van Ghent ghecrijghen conste, hy souden doen braden aen een spit, ghelijc eenen cappoen, welcke verwaende woorden den gheest ter ooren quamen Ende in dit selue vechten hier voorseyde, was desen Capiteyn gheuanghen vanden seluen gheest, ende hi boot duysentich croonen voor sijn rentsoen. Twelcke ghelt hy al in sijn wambeys ghenaeyt hadde. Ende die gheest namt hem al, ende seyde tot hem. Ghi soudt mi ghebraden hebben, maer ic sal hu ghenadich sijn. Maer die capiteyn en woude hem niet vp gheuen inden handen vanden vileynen. Doe stackene den gheest ten slote aen tcorenhuys toudenaerde. Ende daer waren noch.ij.ander gheuanghen, een vlaminck ende een Heynewier, maer omme dat Morissis voorseyde hem niet vp gheuen en wilde, so stackene die Gheest die kele of, ende was begrauen Toudenaerde ten Freren, ende noch een ander Ruddere met hem. Ende in dyt gheuecht waren wel.xiiij.Rudders.huyt Vranckerijcke, ende veel meer andere heeren.

[Den.xix.sten dach van Meye. Anno domini.M.CCCC.ende.lxxviij]

¶ Item vp desen seluen tijt waren Sergianten huyten ambochten ghecoren, omme te treckene yeghens die fransoysen. Ende die cause van desen huytreckene was aldus, hoe dat dye coninc van Vranckerijcke ontboden hadde den Hertoghe van Bourgoengien, dat hi hem beuechten soude, macht yeghen macht, ende hy ordonneirde hem dach ende velt. Dies die Hertoge Maximiliaen wel te vreden was, ende track te velde als een Prinche van eeren. Maer als die coninck van Vranckerijcke dat sach, hi liet den Hertoghe onbeuochten ligghen, ende hy vertrac teenen anderen cante waert, als naer Steenuoorde, meereuile. Ende die fransoysen quamen te peerde in Belle ghereden, ende vijnghen wel.vi^c.mannen, sonder dye si doot sloughen. Ende verbarrenden Belle al of sonder die kercke ende tcloostere van sint Anthonis. Ende dit was vp eenen dijsendach vp den.xix.sten dach van Meye. Anno domini.M.CCCC.ende.lxxviij.ende trocken also naer Poperijnghe stichtende roof ende brandt.

¶ Item die coninc sandt eenen Herault, ende twee trompetten, met noch een persoon ter bueter poorte, buyten der huyterste veste van Ypre. Ende die Herault gaf den awette te kennene dat hi gheerne sijn bootschap ghedaen hadde aen die wet van Ipre van sconincx weghe. Dies eenege vanden awette ghinghen ter halle, ende gauent der wet te kennene. Als waer bi die vander wet van Ipre quamen spreken buyten der poorte yegens den Herault, en sijn gheselschip, ende si dadense beeten van haren peerden, ende verbonden haerlieder ooghen, ende leeddense alsoo in thuys ter sale, in goeder bewaernesse, daer die voorseyde Herault sijn last ontdecte, segghende van sconincx weghe, dat hi hem lieden riedt, dat si quamen in sijnder gracie ende ghenade, of hi soudse al gheheel destrueren ende bederuen. Maer die van Ipre hilden den Herault, ende sijne mede ghesellen in echten. Ende seyden si souden hem lieden antwoorde gheuen binnen drie of vier daghen. Ende die van Ipre sonden terstont aen onsen edelen prinche Maximiliaen te Brugghe, ende aen die wet vander stede van Brugghe, bystant van hem lieden begheerende, ende also voort aen dye van Ghendt.

[Den.xix.sten dach van Meye.Anno domini.M.CCCC.ende.lxxviij]

¶ Item mijn gheduchte vrauwe van Bourgoengien beual mijn heere Lodewijck van den Gruythuyse, als Capiteyn vander stede van Brugghe, te gane byder wet van Brugghe, alsoo hi dede. Ende hi dede sijn harnasch aene, omme selue yeghens dye vyanden te treckene. Dies waren haestelick binnen den seluen auende die Serganten ghecoren, omme te treckene yeghens dye vyanden. Ende was vp den.xix.sten dach van Meye.Anno domini.M.CCCC.ende.lxxviij.

[fol. CC.iiij.v]

[Den.xx.sten dach van Meye]

¶ Vp den.xx.sten dach van Meye mijn here vanden Gruythuyse, Capiteyn vander stede van Brugghe, vertrack met schonen state, ende metvele edele mannen, ghewapent te peerde ten vianden waert, sonderlinghe wel met.L.mannen te peerde. Ende die vanden Vryen, Leenhouders, ende andere, die verbeyden sijne comste te Couckelare, te Thorout, ende daer ontrent.

[Den.xxi.sten dach van Meye]

¶ Item die vanden ambochten vander stede van Brugghe, dye volchden, ende trocken altemet achtere ghewapent, ende hadden alle iorneyen, root ende swart, ende inden middele een witte bende, die welcke Serganten den.xxi.sten dach van Meye, ende tsanderdaechs daer naer huyt Brugghe ghinghen, lijdende voor sprinchen hof, daer me vrauwe van Bourgoengien ter veynstere lach, met mijn heere van Rauesteyn ende meer andere heren ende vrauwen.

¶ Item mijn heere Kaerle van Huytkercke, Burchmeester vanden Courpse, ende oock die Schouteetene van Brugghe die stonden beneden vp die strate, ende telcken dat die ambochten leden, so seyden sijt me vrauwe van Bourgoengien, wie dat si waren huer toenijghende met vriendelicken ghelate. Ende dye Princersse bedancte hem lieden alle van haren ghewilleghen dienste, biddende dat sy goede kinderen wesen wilden, si soude hem lieden een duechdelicke princersse wesen. Aldus vertrack tcommuyn van Brugghe, sonder moeyte of beroerte.

¶ Item hier inne es wel te prijsene den edelen hertoghe Maximiliaen, die noch nauwe.xx.Iaer oudt en was, een eenich sone des Keysers van Roome, dat hi hem also ootmoedich maecte, te commene huyt sijnen edelen landen, ende hier te dalene in lantschepen daer niet dan orloghe ende grote moeyte en was, maer met hertelicker ionste als een edel prinche, beminnende sijne excellente gheselnede Marye van Bourgoengien. Ende hy haer bewijsende dat hy als eenen edelen Arent, onder sijne machteghe vlercken huer persoon, ende hueren landen te goede vallen wilde, alsoot wel blijckelic es, want hi selue in persoone met sijnen edelen te velde ghesleghen es, clouckelick verwachtende alle die hem deeren wilden, rijdende, vertroostende, ende moet gheuende sijne diueersche steden, in tlant van Henegauwe, biddende dat si altijt goet ende ghetrauwe blijuen wilden, want hy die ghene es, also hi tot hem lieden seyde, ende alst oock blijct, dye sijnen edelen persoon nyet sparen en wilde, maer soudene voor hem lieden ende voor sijne landen auentueren. Twelcke soe ghetrauwe pointen sijn, datmense behoort te louene, ende te houdene in grooter eeren ende excellencie.

[Den.xxiiij.sten dach van Meye en den Sacraments dach]

¶ Item me vrauwe de duwagiereghe die quam te Brugghe met seere schoonen state, ghecleet als een wedewe vp den.xxiiij.sten dach van Meye, daer sy eerlic ontfaen was vander stede van Brugghe, ende van vrau Marie van Bourgoengien ons princersse, ende quam ontrent den.ix.hueren vanden auende.

¶ Item vp den Sacraments dach doe was mijns heeren hof te Brugghe chierlic toe ghemaeckt. Die sale ende die plaetse was voren behanghen met tapijtse, ende al besteken met groenen meyen, ende daer was thelich sacrament seer weerdelick ghedreghen, in processyen vanden Canonicken vander cappelle, daer die princersse deuotelic mede ghinc met al haren edelen mannen ende vrauwen. Ende bouen thelich Sacrament was ghedreghen een gulden laken, seer chierlick. Ende mijn heere die protonotaris gheseyt van Brugghe, ende dye sone van Gheldre, ende noch een bastaert van Bourgoengien, ghenaemt Phelips, ende mijn heere van Breane Graue van Simpol ghinghen mede, twelc deuoot om sien was ende schoone.

[Den.xxv.sten dach van Meye]

¶ Vp den.xxv.sten dach van Meye, doe sandt die Burchmeester vander stede van Brugghe Maerten Lem, vp sijn eyghen cost.L.Spaengiaerden, cloucke mannen indien dienst van den Prinche, die welcke vp dye heleghe Euangelie te Brugghe inden Burch swoeren den Prinche ghetrauwelic te dienene den termijn van eender maent tijts. Ende haerlieder Capiteyn sadt vp een schoone Iannette, ende een sijn medegheselle van ghelijcken, ende alle dander waren te voet.

[fol. CC.v.r]

[Den.xxx.sten dach van Meye]

Item vp den.xxx.sten dach van Meye, so vertrac die Abt van Oudenburch met schonen state, wel van.C.ende vichtich peerden, ende wart ontfanghen Abt van sinte Baefs te Ghendt.

[Den.ij.sten dach van Wedemaent.Anno.lxxviij]

¶ Vp den.ij.sten dach van Wedemaent.Anno.lxxviij.was tpyeroen van Luycke te Brugghe vander Buersse of ghedaen, ende weder gheuoert naer Luycke, twelcke die Hertoghe Maximiliaen gheconsenteirt hadde om paeys wille, ende omme eedrachticheyt te houdene tusschen den lande van Brabant ende den lande van Luycke, ende ooc omme dat die Luyckenaers metten fransoysen niet toe vallen en souden.

[Den tweesten dach van Wedemaent]

¶ Item vp den seluen tweesten dach van Wedemaent, doe quamen die fransoysen tusschen Belle ende Poperijnghe, ende hadden een Brugghe ghemaect in die leye, die inder twater stont. Ende Ian van Dadyzeele, ende die gheest van Ghendt met haren medepleghers, si wordens gheware, ende si leyden heymelicke drie laghen metsgaders den lantslieden, ende lieten aldus die fransoysen ouer dye brugghe lijden. Ende doe quamen die vrauwen vanden lande waert ende si braken die brugghe, soe datter dye fransoysen niet weder ouere en mochten. Ende daer waren die fransoysen clouckelick ende onuersien bespronghen, so datter wel twee hondert dood bleuen, dye alle te peerde waren. Ende eeneghe waren gheuanghen, die groot rentsoen gauen. Ende eeneghe swommen duer twatere, ende sommeghe andere verdroncken.