[Den.xxviij sten dach van Ougst]
ITem die edel hertoghe Maximiliaen quam binnen sijnder stede van Brugghe, vp den.xxviij sten dach van Ougst, ghelijck als hi dede binnen der stede van Ghendt, metten seluen heren ende state al in ordonnancien, met swarten standaerden ende pingioenen, ende oock met eenen standaert daer een maecht in stont. Ende dese Prinche voorseyde sadt in sijn vulle harnasch, ende sijn peert was verdect ende verchiert totten voeten toe vul van gouden en selueren bellen, seer rijckelic ende triumphelic om sien. Waer in het ghemeyn volc grote ghenouchte ende corragie in nam.
¶ Item die cruyspoorte daer hi in quam, was al behanghen seer chierlic met lakene, ende bouen voor die poorte stont een seer schoon tafereel, daer die voorseyde edele hertoghe in stont gheconterfeyt naer sinen persoon van schilderyen, ende daer stont ghescreuen. Benedictus qui venit in nomine domini. Dwelck hi ende alle sijne edele heeren ende mannen die met hem quamen seere besaghen.
¶ Item aen beeden sijden vanden straten stonden alle die Ambochten met barnende toortsen voor hem lieden, streckende tot mijns heeren hof toe.
¶ Item die schotters vanden oude boghe ende vanden ionghen, ende ooc vanden hantboghe, reden alle te peerde yeghen hem, wel.iij.mijlen varre al in tvulle harnasch, elc met eender porneye, root ende swart, ende wit in den middele.
¶ Item ooc redender yeghens grote menichte van poorters ende van ambochtslieden, al met ghelijcken iorneyen. Dies dye heeren verwonderden, waermen soe vele peerden in Brugghe vant. Ende alle dander schotters die niet te peerde en waren, dye stonden ter marckt aen beeden sijden, alle int harnasch.
¶ Item die nacie vanden Oosterlinghen reden ooc met groter menichte yeghens hem, ende elck hadde eenen knape met eender barnende toortse in die handt draghende, totten houe toe.
¶ Item voort reden yeghen den voorseyde edelen Prinche, die Baliu, Schoteeten, ende vele wethouders die hem seer minlicken willecomden, ende vele ander heren ende poorters die hem ende sijne gheselnede conuoyeerden tot den houe toe, dwelc hi seer wel nam.
¶ Item aen die oude muelenbrugghe daer stont ghemaect een rijckelic parc, daer in datmen toochde hoe wijlent dye Romeynen blijdelic ontfinghen den Prinche Iulius Cesar, bewijsende hoe blijdelic die van Brugghe daer hueren Prinche ontfinghen. Ende daer stont ghescreuen. Gloriosissime princeps defende nos ne pereamus.
¶ Item in die hoochstrate waren vele huysen wonderlicke verchiert, met behanghene, ende met toortsen.
¶ Item dye Poortingaloysen hadden onsprekelicke vele barnende toortsen. Insghelijcx die Florentijnen, dye Venecianen, die Oosterlinghen. Ende die Spaengiaerden hadden een huys van bouen vpt dack tot beneden toe vul barnende toortsen, ende alle andere nacien van ghelijcken.
¶ Item aen thuys gheheeten Blanckenberghe, stont ooc een chierlic parc, ende was Ioseph die patriarcke, die welcke rijckelic ontfanghen was. Ende daer stont gheschreuen. Sapientiam amaui et exquisiui a iuuentute mea, et exquisiui eam sponsam mihi assumere.
¶ Item dye oude ende nyeuwe halle waren rijckelic behanghen met lakene, blaeu, wit ende root besaeyt met sprinchen wapene.
¶ Item noch voor sprinchen hof stont een parck, daer in ghetoocht was, hoe dat die Prinche Theodosius om sijnder eerbaerheyt wille quam ter keyserlicker croone, ende daer stont ghescreuen. Iusticia indutus fui, et vestiui me sicut vestimento et dyademate iudicio meo. Ende in dusdaneger manieren ende schoonder triumphe passereide die voorseyde edel Prinche, met sijnder edele gheselnede, tot binnen sijnen houe.etc.
Maximiliaen hooch prinche ontfaen
Achtentwintich in Ougst M of ghedaen.
Auteursrechtvrij
