Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier naer volcht hoe dat die edel Hertoghe Maximiliaen, sone vanden keyser Frederick, trauwede sijn bruyt, Marie van Bourgoengien.

¶ Dat.lxvi.Capittel.

[fol. C.xcij.r]

ALs alle dese voorseyde saken gheleden waren, so quam die voorseyde brudegomme tsanderdaechs, ende was dijsendach des morghens, ten vi.hueren, seere rijckelick ghecleet tot sijnder bruyt, die welcke ooc seer chierlick bereet was, ende daer waren si beede ghetrauwet vanden Legaet voorseyde. Ende daer waren die bruytleeders mijn heere vanden Gruythuyse, ende die graue van Synay, in die presentie vanden Bisschop van Mets, den Bisschep van Triere, ende den Bisschop van Doornicke, ende vele meer andere Princhen ende princerssen. Ende die bruydegom besliep sijn bruyt des dijsendaechs sauents, maer het was gheordonneirt datmen die brulocht te Brugghe houden soude. Ende hi was die xxx.ste Graue van Vlaendren van sijns wijfs weghe, vrau Marie van Bourgoengien eeneghe dochtere vanden Hertoge Kaerle.

¶ Item die lantgraue van Hessen, die metten voorseyde brudegomme commen was, dye quam te Brugghe met groot volc van wapenen, vp den.xxvi.dach van Ougst, dijsendach sijnde, alle met cranekynieren ende colueueren ende pijckenieren, met vele carrijnen, ende vele mannen van wapenen te peerde. Ende dese trocken alle naer sint Omaers, om te wederstane den fransoysen, ende waren wel.v^c.mannen sterck, daer al tvolc van Vlaendren seer in verblijde, alst wel redene was.

¶ Vp desen seluen tijt dede die coninc Lodewijc van Vranckerijcke grote neersticheyt omme die stede van sint Omaers te verradene Ende hi ghecreech vrienden van binnen der stede, te wetene eene gheheeten Ian de la

[fol. C.xcij.v]

heye, met sijnen medepleghers. Ende was doe gheordonneirt vp eenen sekeren auentstont, dat dese voorseyde Ian de la heye soude tvier ghesteken hebben ten.iij.steden binnen sint Omaers. Ende dye fransoysen tvier ghesien hebbende, souden met groter cracht voor die poorte ghecommen hebben, dies soude die voorseyde Ian de la heye tauwet ter poorten of ghesleghen hebben met sijnen medepleghers, ende also die fransoysen inne ghelaten maer byder gracien gods dese valsche verraderye en quam nyet ter perfectie. Ende Ian voorseyde wart gheuanghen, ende ghequarteleirt, ende ter poorte, ten Fransoysen waert sijn hooft huyt ghesteken.

¶ Item die coninc dit vernemende dat sijne valschede openbaer gheworden was, ende sijn vrient ghequartiert, ende oock verstaende dat die Hertoghe Maximiliaen in Vlaendren commen was, ende ghehuwet met sijnder nichte van Bourgoengien. Ende dat die lantsgraue van Hessen met veel volcx van wapenen, binnen sint Omaers was. Hi vandt in sinen raet dat hi vertrac van sint Omaers naer Theerenburch.

[Den.xxviij.sten dach van Ougst. Anno lxxvij]

¶ Als hertoghe Maximiliaen aldus ghehuwet was aen onse hoghe ende moghende princersse, so quam hi ter bede vanden edelen ende vanden nacien binnen der stede van Brugghe, vp den.xxviij.sten dach van Ougst. Anno lxxvij.ende was vp eenen donderdach. Ende met hem quam mevrauwe van Bourgoengien sijne gheselnede, ende me vrauwe de Duwayereghe van Bourgoengien, ende met groter menichte van duytschen heren, ende ooc van desen landen, ende vele edele vrauwen ende ioncfrauwen.